იუსტიციის მინისტრი პაატა სალია აცხადებს, რომ „დადასტურებით“ შეუძლია თქვას: გლდანის მე-8 დაწესებულებაში ბრალდებული დავით ფეიქრიშვილი, – რომელიც მძიმე დაზიანებებით „ვივამედში“ მოხვდა და ძალადობაში ვატო ყიფიანს ადანაშაულებდა – იზოლატორში „ნამდვილად არ იყო მარტო“.
28 ოქტომბერს ტელეკომპანია „რუსთავის 2-ის“ „ღამის კურიერში“ ტელეწამყვანის შეკითხვაზე, რა ინფორმაცია აქვს მინისტრს – „ერთია იქ რა მოხდა, მაგრამ იყო თუ არა ფეიქრიშვილის საკანში შესახლებული ვატო ყიფიანი თანხმლებ პირებთან ერთად“, – პაატა სალიამ განაცხადა:
„დავიწყებ იმით, რომ როგორც კი საზოგადოებისთვის გახდა ცნობილი მედიის საშუალებით ფეიქრიშვილთან დაკავშირებული ინციდენტის შესახებ, მყისიერად დავიწყეთ გამოძიება“.
ჯერ გამოძიება სამინისტროს გენერალურმა ინსპექციამ დაიწყო, თუმცა „გარკვეული ჩვენებებიდან გამომდინარე“, მიზანშეწონილად მიიჩნიეს, პროკურატურას გაეგრძელებინა გამოძიება. მან თქვა, რომ ამ ჩვენებების დეტალებზე გამოძების ინტერესებიდან გამომდინარე არ ისაუბრებს.
„ერთი რამ შემიძლია დაგიდასტუროთ: ნამდვილად ფეიქრიშვილი არ იყო მარტო საკანში“, – განაცხადა მან.
„დანარჩენი, რატომ მოხდა ამ პირების შესახლება [გამოძიება დაადგენს]“ – თქვა მან.
დამაზუსტებელ კითხვაზე, სხვა პირები მასთან შეასახლეს თუ არა და იყო თუ არა მათ შორის ვატო ყიფიანი, მინისტრმა თქვა:
„ამას უკვე გამოძიება დაადგენს კონკრეტულად იმ პირების სახელებსა და გვარებს, ვინ იყვნენ, რამდენი პირი იყო, რატომ მოხდა მათი შესახლება, ვინ ხელმძღვანელობდა, ვინ კურირებდა, ვინ იყო ინფორმირებული და ა.შ“, – განაცხადა მან.
„იმედი მაქვს, მალე გვეცოდინება გამოძიების თუნდაც პირველადი შედეგები“, – განაცხადა მან. სხვა დეტალები აღარ დაუზუსტებია.