საფრანგეთი თავდაცვის ბიუჯეტს დაჩქარებული წესით გაზრდის. როგორც საფრანგეთის პრეზიდენტმა, ემანუელ მაკრონმა განაცხადა, რუსეთიდან მომავალი საფრთხის ფონზე პარიზი დააჩქარებს საკუთარი არმიის გადაიარაღებას და ამ მიზნით მილიარდობით ევროს დაგეგმილზე ადრე გამოყოფს.
მისი თქმით, 2026 წელს საფრანგეთის დამატებით თავდაცვაზე 3,5 მილიარდ ევროს დახარჯავს, რომ 2027 წელს დაგეგმილი ხარჯები სამი მილიარდი ევროთი გაიზრდება.
„ამგვარად, 2027 წელს თავდაცვის ხარჯები იქნება 64 მილიარდი ევრო. ეს არის სამხედრო ხარჯებისთვის გამოყოფილი თანხების გაორმაგება“,- აღნიშნა მაკრონმა.
როგორც ცნობილია, თავდაპირველად საფრანგეთის თავდაცვითი ბიუჯეტის გაორმაგება 2030 წლისთვის იგეგმებოდა.
„მეორე მსოფლიო ომის დასრულებიდან თავისუფლებას ასეთი საფრთხე არასდროს დამუქრებია. მშვიდობა ჩვენს კონტინენტზე ჯერ არასდროს ყოფილა ასეთი დამოკიდებული ჩვენს მიმდინარე გადაწყვეტილებებზე“, – განაცხადა ემანუელ მაკრონმა.
საფრანგეთის პრეზიდენტის თქმით, საფრთხეებთან გასამკლავებლად საფრანგეთმა მეტი ინვესტიცია უნდა დააბანდოს საბრძოლო მასალაში, დრონებში, ანტისაჰაერო თავდაცვით სისტემებში და ასევე რადიოლოკაციური ბრძოლის საშუალებებსა და კოსმოსურ შეიარაღებაში.
მაკრონის თქმით, ევროპის ქვეყნებმა საკუთარ თავდაცვაზე თავად უნდა იზრუნონ და ერთობლივად დააბანდონ მეტი ფული შეიარაღებაში.