პოლონეთი, სლოვაკეთი, უნგრეთი და ბულგარეთი უკრაინასთან ევროკავშირის ახალი სავაჭრო შეთანხმებით უკმაყოფილო არიან და მის გადახედვას ითხოვენ. ისინი ბრიუსელს მოუწოდებენ, ევროპელი ფერმერები შეუზღუდავი რაოდენობის უკრაინული სასოფლო-სამეურნეო პროდუქციის შემოდინებისგან დაიცვან.
მიმართვის წერილი ევროკავშირში უნგრეთის მისიამ სოციალურ ქსელ X-ზე გამოაქვეყნა. ევროკავშირის წყარომ უკრაინის საზოგადოებრივ მაუწყებელს (Suspilne) განუცხადა, რომ მოწოდებას რუმინეთიც შეუერთდება.
4 ქვეყანა (პლუს, რუმინეთი) ითხოვს, რომ ევროკომისიამ უკრაინული სასოფლო-სამეურნეო პროდუქციის კვოტები იმ დონეზე დააბრუნოს, როგორიც უკრაინაში რუსეთის სრულმასშტაბიან შეჭრამდე არსებობდა. პოლონეთი, უნგრეთი, სლოვაკეთი და ბულგარეთი ასევე ითხოვენ, რომ ევროკავშირის ბაზრებზე წვდომისთვის აუცილებელი ცხოველთა მოშენებისა და გარემოსდაცვითი სანიტარული ნორმები უკრაინამ ევროკავშირის სტანდარტებს შეუსაბამოს.
წერილში ასევე ნათქვამია, რომ ევროკომისიამ უნდა დააწესოს უფრო დაბალი ზღვრული ფასები უკრაინიდან შემოსულ სასოფლო-სამეურნეო პროდუქტებზე, რომელსაც უკრაინელი მწარმოებლები დაემორჩილებიან. სწორედ ასე ხედავენ ეს ქვეყნები უკრაინელი მეწარმეების მიერ სასოფლო-სამეურნეო პროდუქტების საშუალებით წარმოებულ სავარაუდო დემპინგთან გამკლავების გზებს.
უკრაინამ და ევროკავშირმა დაასრულეს სავაჭრო შეთანხმების პროექტის შემუშავება, რომელიც 2022 წელს შემოღებულ „უვიზო სავაჭრო რეჟიმს“ ჩაანაცვლებს. შეთანხმების პროექტის თანახმად, უკრაინას ეზრდება ევროკავშირში ექსპორტის კვოტები შემდეგ პროდუქტებზე: სოკო, გადამუშავებული რძის პროდუქტები, თაფლი, შაქარი, ხორბალი, ქერის ბურღული და ა.შ.
ევროკავშირმა „უვიზო სავაჭრო რეჟიმი“ 2022 წლის 4 ივნისს შემოიღო, რათა მხარი დაეჭირა უკრაინელი მწარმოებლებისა და ეკონომიკისთვის რუსულ აგრესიასთან გამკლავებაში.
ამავდროულად, ევროკავშირმა სახმელეთო საზღვრებზე შემოიღო ე.წ. „სოლიდარობის დერეფნები“, რათა უკრაინას, რუსეთის მიერ შავი ზღვის პორტების ბლოკადის პირობებში, შესაძლებლობა ჰქონოდა, საგარეო ბაზრებზე სასოფლო-სამეურნეო პროდუქციის ექსპორტი გაეგრძელებინა.
2023 წელს ეს რეჟიმი კიდევ ერთი წლით გაგრძელდა.
ევროკავშირის ბაზრის დასაცავად, 2024 წელს ევროკომისია გამოვიდა კვოტების შემოღების ინიციატივით გარკვეულ პროდუქტებზე (კვერცხი, ფრინველი, შაქარი, შვრია, სიმინდი, მარცვლეული და თაფლი). 2024 წლის 13 მაისს ევროკავშირმა დაამტკიცა უკრაინისთვის „უვიზო სავაჭრო რეჟიმის“ გაუქმება და უბაჟო და უკვოტო ვაჭრობა გააგრძელა. განახლებული მაჩვენებლები 6 ივნისს ამოქმედდა და 2025 წლის 5 ივნისამდე იქნება ძალაში.
2025 წლის მაისში, პოლონეთმა, ევროკავშირის მასშტაბით მისი დასრულების გარეშე, ავტონომიური სავაჭრო ზომების რეჟიმი, ანუ უკრაინასთან „უვიზო სავაჭრო რეჟიმი“ გააუქმა.