საქართველოს თავდაცვის ძალების წვრთნებისა და სამხედრო განათლების სარდლობის საერთო საჯარისო ცენტრის დაარსებიდან 9 წელი გავიდა. საიუბილეო ღონისძიება კრწანისში, ცენტრის ტერიტორიაზე გაიმართა. ცერემონიალს საერთო საჯარისო ცენტრის მეთაური, პოლკოვნიკი ნიკოლოზ აგლაძე, თავდაცვის ძალების წვრთნებისა და სამხედრო განათლების სარდალი, პოლკოვნიკი ზურაბ ხვიჩია, სამხედრო მოსამსახურეები და მათი ოჯახის წევრები დაესწრნენ.
საერთო საჯარისო ცენტრის მეთაურმა და წვრთნებისა და სამხედრო განათლების სარდალმა სიტყვით გამოსვლისას, ცენტრის მისიასა და როლზე ისაუბრეს. განსაკუთრებული ხაზგასმით აღინიშნა ეროვნულ და საერთაშორისო სწავლებებში ცენტრის წარმომადგენელთა აქტიური მონაწილეობა.
ღონისძიება, წარმატებული სამხედრო მოსამსახურეების დაჯილდოებით გაგრძელდა. მათ უწყებრივი მედლები, მადლობის სიგელები და სამახსოვრო საჩუქრები გადაეცათ.
თავდაცვის უწყების წარმომადგენლებმა პატივი მიაგეს საქართველოს ტერიტორიული მთლიანობისთვის და საერთაშორისო მისიებში დაღუპულ მებრძოლთა ხსოვნას. საიუბილეო ღონისძიებაზე, სპეციალურად მოწყობილ გამოფენაზე მოწვეულ სტუმრებს საშუალება ჰქონდათ გაცნობოდნენ საერთო საჯარისო ცენტრში არსებულ შეიარაღებასა და ტექნიკას.
საერთო საჯარისო ცენტრი 2016 წელს „ეროვნული სასწავლო ცენტრი კრწანისის“ ბაზაზე ჩამოყალიბდა. საერთო საჯარისო ცენტრის ამოცანაა: თავდაცვის ძალებისთვის ძირითადი სამხედრო სპეციალობების მიხედვით უმცროს ოფიცერთა და სერჟანტ-კაპრალთა მომზადება და გადამზადება, ტაქტიკური დონის დოქტრინებისა და ტექნიკური სახელმძღვანელოების შემუშავება, თავდაცვის ძალებში ახალი შესაძლებლობების დანერგვის პროცესში მონაწილეობა და სამხედრო სწავლებების შეფასების პროცესის მხარდაჭერა.