მტრულ საქმიანობაში დახმარებისა და საბოტაჟის საქმეზე გენერალურ პროკურატურაში გამოძიება გრძელდება. თავდაცვის ძალების ყოფილი მეთაურის ვლადიმერ ჩაჩიბაიას გამოკითხვა სამ საათზე მეტს გაგრძელდა. როგორც თავად ამბობს, ჩორჩანაში საგუშაგოს განთავსების შესახებ წინასწარ ინფორმაცია არ ჰქონია. ჩაჩიბაია ასევე ამბობს, რომ ეს გადაწყვეტილება გამართლებული არ იყო.
„არ ვიცოდი ჩორჩანასთან დაკავშირებით რა ხდებოდა. ეს გავიგე მეორე დღეს. ნებისმიერი შემთხვევისთვის მზად უნდა ვყოფილიყავით. ჩავატარე თათბირი, მაქსიმალური ყურადღება რომ ყოფილიყო ქვედანაყოფებში, რომ რამე ინციდენტის შემთხვევაში მთავრობის მეთაურისა და თავდაცვის მინისტრის ბრძანების შემთხვევაში მზად ვყოფილიყავით რეაგირებისთვის.
გზის გაყვანის პროცესი იყო უკვე შემდგომი ეტაპი. ჩვენ უბრალოდ მატერიალურ-ტექნიკური მხარდაჭერა გავუწიეთ. რამდენიმე საგუშაგოს დაკავშირებისთვის საჭირო იყო მატერიალურ-ტექნიკური ბაზა. შესაბამისად, ჩვენ აღმოვუჩინეთ ეს მხარდაჭერა. მე რომ ვყოფილიყავი, რა თქმა უნდა, შევეცდებოდი გარკვეულწილად სხვა ფორმით მემოქმედა, თუმცა ეს გადაწყვეტილება მიღებულია.
ინფორმაცია რაც მაქვს, ტერიტორიები დაიკარგა. დანარჩენი არ ვიცი“, – განაცხადა ჩაჩიბაიამ.
ხვალ საგამოძიებო უწყებაში ყოფილი თავდაცვის მინისტრი ლევან იზორია გამოიკითხება. გამოძიებას კითხვები, 2019 წლის 24 აგვისტოს სოფელ ჩორჩანაში საგუშაგოს ჩადგმასთან დაკავშირებით აქვს. მაშინ შინაგან საქმეთა მინისტრი გიორგი გახარია იყო.