საქართველოს სასაზღვრო პოლიციის უფროსის პირველი მოადგილე გიორგი გურეშიძე, დელეგაციასთან ერთად, თურქეთის სანაპირო დაცვის მიწვევით თურქეთის რესპუბლიკაში იმყოფებოდა.
სასაზღვრო პოლიციის ინფორმაციით, ვიზიტის ფარგლებში საქართველოს სასაზღვრო პოლიციის წარმომადგენლები თურქეთის სანაპირო დაცვის ხელმძღვანელს, ვიცე-ადმირალ აჰმედ ქენდირს შეხვდნენ. მხარეებმა თურქეთის სანაპირო დაცვასა და საქართველოს სასაზღვრო პოლიციას შორის არსებული ორმხრივი თანამშრომლობა განიხილეს.
ხაზი გაესვა თურქეთის მხარის მნიშვნელოვან დახმარებას პირადი შემადგენლობის მომზადებასა და მატერიალურ-ტექნიკური მხარდაჭერის კუთხით. ასევე, განისაზღვრა სამომავლო თანამშრომლობა და სანაპირო დაცვის დეპარტამენტისათვის ტექნიკური დახმარების აღმოჩენის მიმართულებები.
ვიზიტის ფარგლებში, გიორგი გურეშიძე სტამბოლის საგამოფენო ცენტრში თავდაცვის ინდუსტრიის მე-17 საერთაშორისო გამოფენას (IDEF 2025) დაესწრო. სადაც, სასაზღვრო პოლიციის სანაპირო დაცვის დეპარტამენტის დირექტორი იური ფირცხალაიშვილი და სასაზღვრო პოლიციის საერთაშორისო ურთიერთობების სამმართველოს უფროსი რამაზ პაპიძე იმყოფებოდნენ.
გამოფენაზე საქართველოს დელეგაციის წევრები თურქეთის რესპუბლიკის სამხედრო ინდუსტრიის მიღწევებს, მათ შორის საზღვაო უსაფრთხოების სფეროში არსებულ ტექნოლოგიებს გაეცნენ.