საქართველოს ისტორიას არ ახსოვს მსგავსი რუსეთის აგენტები, როგორიც დღეს ჩვენი ოპოზიციაა., – განაცხადა საპარლამენტო უმრავლესობის წევრმა, ირაკლი ჭეიშვილმა, რითაც იგი სოციალურ ქსელში ზურა გირჩი ჯაფარიძის მიერ გამოქვეყნებულ პოსტს გამოეხმაურა.
„საქართველოს ისტორიას არ ახსოვს მსგავსი რუსეთის აგენტები, როგორიც დღეს ჩვენი ოპოზიციაა. ეგეთი რუსული საქმე საქართველოში, მგონი, დღემდე არავის უკეთებია. არც ერთი მტკიცებულება არ გააჩნიათ ჩვენ მიმართ, რომ ჩვენ რაიმე ტიპის შემხებლობა გვქონდეს რუსეთთან და რაღაცას ბოდიალი აქვთ – ის, რომ თითქოს, ჩვენი რაღაც განცხადებები ემთხვევა და ასე შემდეგ“, – განაცხადა ჭეიშვილმა.
მმართველი გუნდი ზურა გირჩი ჯაფარიძეს სიცრუის გავრცელებაში ადანაშაულებს. „ქართული ოცნების“ წევრები ჯაფარიძეს წარსულს ახსენებენ და აცხადებენ, რომ ზურა ჯაფარიძე გულწრფელი მხოლოდ მაშინ იყო, როდესაც ამბობდა, რომ „ნაცმოძრაობას“ დანაშაულები არ ჩაუდენია. ამბობენ, რომ პრორუსული იარლიყის მიკერება, „დიფ სთეითის“ ერთ-ერთი გამოვლინებაა.
ცნობისთვის, ჯაფარიძის „ფეისბუქ“ გვერდზე, მისი სახელით გამოქვეყნდა განცხადება, სადაც საუბარია, რომ თითქოს, ხელისუფლება რუსულ ნარატივს იმეორებს.