კეთილი ინებონ და ახსნან თავიანთი პოზიცია. უსტარების გამოგზავნას თავი დაანებონ, თითების ქნევას ქართული საზოგადოების მიმართ, – განაცხადა პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ ვიზალიბერალიზაციის შეჩერების მუქარასთან დაკავშირებით.
„როგორც საბჭოთა კავშირის დროს მოსკოვიდან მოდიოდა დირექტივა და ყველა რესპუბლიკა ვალდებული იყო შეესრულებინა ზედმეტი კითხვების გარეშე, ახლაც იგივე გვაქვს. დირექტივაა მოსული და მცდელობაა, რომ ქართული საზოგადოება დასაჯონ, დასაბუთების, არგუმენტების გარეშე. დალაპარაკებაც კი არ სურთ. ერთ მაგალითსაც ვერ ამბობენ, რა არის იმ [„ქართული ოცნების“ მიერ მიღებულ] საკანონმდებლო ცვლილებებში. ასე არ საუბრობენ ქვეყნებთან, დამოუკიდებელ და ღირსეულ ხალხთან. კეთილი ინებონ და ახსნან თავიანთი პოზიცია. უსტარების გამოგზავნას თავი დაანებონ, თითების ქნევას ქართული საზოგადოების მიმართ და დასხდნენ, ილაპარაკონ“, – აღნიშნა გორდულაძემ.