კომპანია რომ მძიმე ფინანსურ მდგომარეობაში იყო და ძალიან დიდი ოდენობის ვალები ჰქონდა, ეს ფაქტია. არსებობს თანხა, რომელიც უნდა მოხმარებოდა კომპანიას, მაგრამ სად წავიდა, არ ვიცი, – განაცხადა „მთავარი არხის“ დირექტორმა, გიორგი ქურდაძემ.
„მთავარი არხის“ ოფისში ჩატარებული საგამოძიებო მოქმედებების გამო „ქრონიკამ კითხვით მიმართა „მთავარი არხის“ დირექტორს გიორგი ქურდაძეს, კერძოდ, რა ფინანსურ დოკუმენტაციაზეა საუბარი.
„ალბათ საბუღალტრო დოკუმენტაცია და ის დოკუმენტაცია, რაც უნდა ჰქონდეს კომპანიას თავისი ფინანსური ანგარიშგების წარმოებისთვის. მე მქონდა განცხადება გაკეთებული, რომ თავის დროზე მოვითხოვე გარკვეული დოკუმენტაცია, რაც საჭირო იყო იმისთვის, რომ როგორც დირექტორს მეფუნქციონირა, მაგრამ დოკუმენტაცია ვერ მივიღე.
კომპანია რომ მძიმე ფინანსურ მდგომარეობაში იყო და ძალიან დიდი ოდენობის ვალები ჰქონდა, ეს ფაქტია. არსებობს თანხა, რომელიც უნდა მოხმარებოდა კომპანიას, მააგრამ სად წავიდა, არ ვიცი“, – განაცხადა ქურდაძემ.
მისივე თქმით, გვარამიასა და ნაყოფიას მიერ თანხების მითვისების შესახებ ეჭვი აქვს, თუმცა „ხელთ საბუთი არ აქვს.“
„კი, ბატონო, ეჭვი ბევრი მაქვს. არც საბუთი გაქვს ხელთ და ვერც საბუთს იღებ და არავინ გაძლევს, შესაბამისად, პასუხს ვერ იღებ, ამიტომ რა თქმა უნდა, ეჭვი ბევრი წარმოიშვება.
რატომ არ იხდიან ბიუჯეტში ფულს, რატომ დაიდეს ბიუჯეტის ვალი? რატომ დაიდეს სხვა კომპანიების ვალი? – არ ვიცი“, – განაცხადა სატელეფონო საუბრისას ქურდაძემ.
„მთავარი არხის“ ოფისში საგამოძიებო მოქმედებები დღეს სამ საათზე მეტხანს გაგრძელდა. ამოღებულია ფინანსური დოკუმენტაცია. პროცესი ტელეკომპანიის დირექტორის, გიორგი ქურდაძის მოთხოვნით დაწყებულ გამოძიებას უკავშირდება.
საქმეზე გამოძიება რამდენიმე მუხლით მიმდინარეობს, მათ შორის წინასწარი შეთანხმებით ჯგუფის მიერ საწარმოში ხელმძღვანელობითი უფლებამოსილების ბოროტად გამოყენება, ასევე იურიდიული პირის კუთვნილი თანხების მითვისება გაფლანგვა და ფულის გათეთრება.