მოსკოვი და კიევი დაღუპულთა ცხედრების დაბრუნებაზე მოლაპარაკებებს მართავენ. უკრაინას სამი ათასი დამცველის ცხედარი უნდა გადაეცეს. ვარაუდობენ, რომ, შესაძლოა, 40 000-მდე ცხედარი საპირისპირო მიმართულებით გაიგზავნოს. ნეშტების ძებნაში, არმიისა და პოლიციის გარდა, მოხალისეთა ორგანიზაცია Placdarm UA-ც მონაწილეობს. მისი თანამშრომლები ორივე მხარის ჯარისკაცების ცხედრების ამოცნობას ცდილობენ. მათ რუსებიც უკავშირდებიან, რომლებიც თავიანთ ნათესავებს ეძებენ.
ძლიერი აფეთქების შედეგად დაგრეხილ რკინის კონსტრუქციებს ყოველდღე რამდენიმე ათეული მანქანა ჩაუვლის ხოლმე. მას თითქოს ვერავინ ამჩნევს, აქ არავინ ჩერდება. ამ რკინის გროვის შიგნით, რაც ოდესღაც ტანკს წარმოადგენდა, ჯერ კიდევ არის ჯარისკაცის ნეშტი.
„ყველაზე დიდი პრობლემა ის არის, რომ აფეთქების შედეგად, ძვლებიც კი იწვის. სხეული დღემდე საბრძოლო მანქანაში რჩება. როდესაც დეტონაცია დახურულ სივრცეში ხდება, სხეულის ნაწილება მთელ ტანკში მიმოიფანტება“, – ასე აღწერს სურათს Placdarm UA-ს დამფუძნებელი, ალექსეი იუკოვი.
„რუსეთის შეჭრის დაწყებიდან, Placdarm UA-მ ფრონტის ხაზზე დაღუპული სამი ათასი ადამიანის ცხედარი მოიძია. ორგანიზაცია რუს და უკრაინელ ჯარისკაცებს ერთმანეთისგან არ ასხვავებს. ფრონტის ორივე მხარეს ყველა იმსახურებს იცოდეს, რა დაემართა მათ საყვარელ ადამიანს“, – ამბობს ჩეხეთის ტელევიზიის (CT) კორესპონდენტი, დარია სტომატოვა.
ნეშტების შემოწმება
მუშებს ყველა ცხედარი ბორცვზე ააქვთ, სადაც ქარი სუნს უკეთ ფანტავს. ისინი ძვლების ფრაგმენტებს ექსჰუმაციის ხალიჩაზე ალაგებენ, რათა დადგინდეს, ჩონჩხს რომელი ნაწილი აკლია. იუკოვი ამ პროცედურას 26 წელია ატარებს. ოდესღაც ის მეორე მსოფლიო ომის მსხვერპლთა ნეშტებს ეძებდა. ამასთან, ყველა ცხედრის დოკუმენტებსა და სამხედრო ჟეტონებს აგროვებს.
„ომი ვერ დასრულდება, სანამ დაღუპულებს არ დააბრუნებენ. ამიტომ, როდესაც რუს ჯარისკაცს ვპოულობთ, დარწმუნებული ვართ, რომ მას ჩვენს დამცველებში გაცვლიან“, – განაცხადა Placdarm UA-ს მოხალისემ, რომელმაც ჩეხეთის ტელევიზიის გადამღებ ჯგუფს არტურად გაეცნო.
Placdarm UA-ს მიერ ნაპოვნი ექვსი დაღუპულიდან ოთხი რუსია. მოხალისეებმა ათასზე მეტი ცხედრის რუსეთში დაბრუნებაში მიიღეს მონაწილეობა. ისინი ხშირად პირდაპირ ფრონტის ხაზზე მიდიან ცხედრების გამოსატანად.
„ენით აღუწერელი სურათია. ეს არის გვამების ჭიანჭველეთი – მთელი ქვეყანა დაღუპული რუსი და უკრაინელი ჯარისკაცების გვამებით არის დაქსელილი“, – ამბობს იუკოვი.
„ადგილებზე ჯერ კიდევ დგას გახრწნილი გვამების აუტანელი სუნი, რომელსაც ზაფხულის სიცხე კიდევ უფრო ამძაფრებს. მაგრამ მათი გულდასმით გამოკვლევა ძალიან მნიშვნელოვანია – ამან შეიძლება პასუხი გასცეს კითხვას, თუ ვინ იყვნენ დაღუპვამდე ეს ადამიანები“, – დასძენს სტომატოვა.