ევროკავშირმა მიმდინარე წლის ოქტომბერში შესაძლოა მიიღოს რეგულაცია, რომლითაც მოქალაქეების პირად მოკლეტექსტურ შეტყობინებებს გააკონტროლებს. ინფორმაციას ამერიკელი და ევროპელი ბლოგერები, მათ შორის ყოფილი ევროპარლამენტარი პატრიკ ბეიერი და ილონ მასკი ავრცელებენ.
საუბარია პროექტზე სახელად „ჩათის კონტროლი“, რომელიც ისეთ აპლიკაციებში, როგორებიცაა WhatsApp, Signal თუ Telegram, მოკლეტექსტურ შეტყობინებებს იქამდე დაასკანერებს, ვიდრე ისინი დაიშიფრება.
ბლოგერები წერენ, რომ ეს სახელმწიფოს მხრიდან თვალთვალის მოწყობილობა იქნება და ძირს გამოუთხრის კონფიდენციალურობასა და პერსონალური მონაცემების დაცვას.
ყოფილი ევროპარლამენტარი პატრიკ ბეიერი განმარტავს, რომ ეს ინიციატივა რამდენჯერმე ჩავარდა თუმცა ახლა პროექტის წარდგენა იგეგმება და მას ევროკავშირის წევრი 27 სახელმწიფოდან 19 უჭერს მხარს.