ყოფილი მთავარი პროკურორის, ოთარ ფარცხალაძის ადვოკატები აუდიტის სამსახურს კანონის დარღვევაში ადანაშაულებენ.
ადვოკატების თქმით, აუდიტის სამსახურმა აუდიტორთა ეთიკის მე-8 მუხლი დაარღვია, აუდიტის შედეგები საჯარო შემაჯამებელი დოკუმენტის შემუშავებამდე გახადა.
„სახელმწიფო აუდიტორის და მისი მოადგილის გავრცელებული ინფორმაცია წარმოადგენს სახელმწიფო აუდიტის სამსახურის აუდიტორთა ეთიკის მე-8 მუხლის მეორე პუნქტის დარღვევას, რომლის თანახმადაც, აუდიტორი ვალდებულია აუდიტის შედეგები არ გახადოს საჯარო, აუდიტის შედეგების შემაჯამებელი შესაბამისი დოკუმენტის შედგენამდე.
ჩვენს შემთხვევაში, არა თუ შემაჯამებელი დოკუმენტი, არამედ აუდიტორული ანგარიშის პროექტიც არ ყოფილა მომზადებული, რაც ე.წ. შუალედური ინფორმაციის წარმოდგენით, მათი მხრიდან კანონის უხეშ დარღვევაზე მეტყველებს,“ – განაცხადა ადვოკატმა მერაბ ჩიქოვანმა.
ჩიქოვანის თქმით, თორდიას სამსახურის მიერ გუშინ გამართული ბრიფინგი მოსახლეობის შეცდომაში შეყვანას ისახავდა მიზნად.
“გუშინდელი ბრიფინგი იყო მორიგი მცდელობა საზოგადოების შეცდომაში შეყვანისა და ნათელი მაგალითი პირადი მიზნებისთვის სამსახურეობრივი მდგომარეობის გამოყენებისა. ნათელია ისიც, რომ ბატონი თორდიას მიერ დაანონსებულ დასკვნას საზოგადოება ელოდებოდა დაახლოებით კვირა ნახევარი, თუმცა აღმოჩნდა, რომ არა თუ დასკვნა, არამედ პროექტიც კი არ ყოფილა მომზადებული, რაც მეტყველებს იმაზე, რომ გუშინდელ ბრიფინგზე მომზადებული ინფომრაცია სახელდახელოდ მოამზადეს,“ – განაცხადა მერაბ ჩიქოვანმა.