დიდგორის ბრძოლის 904-ე წლისთავთან დაკავშირებით, „დიდგორობის“ ღონისძიება გაიმართა.
დიდგორის ბრძოლიდან ცხრა საუკუნეზე მეტი გავიდა. ბრძოლის 904-ე წლისთავთან დაკავშირებული სახალხო ღონისძიებები, ტრადიციულად, დიდგორის ველზე მემორიალთან გაიმართა.
სახალხო დღესასწაულზე შეკრებილ საზოგადოებას საქართველოს პრემიერ-მინისტრმა ირაკლი კობახიძემ და ვიცე-პრემიერმა, თავდაცვის მინისტრმა ირაკლი ჩიქოვანმა სიტყვით მიმართეს. პრემიერ-მინისტრმა საქართველოს ისტორიაში დიდგორის ბრძოლის მნიშვნელობაზე გაამახვილა ყურადღება.
მისი განმარტებით, ეს დღე ქართველი ერის უდრეკი სულის, ერთიანობისა და გამარჯვების სიმბოლოა. თავდაცვის მინისტრმა საკუთარ გამოსვლაში აღნიშნა, რომ დიდგორობა არა მხოლოდ წარსულის დიდების გახსენება, არამედ საამაყო წინაპართა გამოცდილების კიდევ ერთხელ გააზრების შესაძლებლობაა. მისი განცხადებით, თავდაცვის ძალების თითოეული სამხედრო მოსამსახურე, სწორედ, ამ ისტორიული მემკვიდრეობის ღირსეული გამგრძელებელია. შეკრებილ საზოგადოებას დიდგორობის დღესასწაული მიულოცა საპატრიარქო ტახტის მოსაყდრემ, მეუფე შიომ.
საზეიმო ღონისძიებაზე ირაკლი ჩიქოვანმა თავდაცვის ძალების სამხედრო მოსამსახურეები დააჯილდოვა უწყებრივი მედლებით – “დიდგორის ჯვარი”. სამხედროებს მედალი საომარი და საბრძოლო მოქმედებების დროს გაბედული მოქმედებებისათვის, ლიდერის თვისებებისა და თანამებრძოლის სიცოცხლის გადარჩენისათვის გამოჩენილი მამაცობისათვის გადაეცემათ.
დიდგორობის სახალხო დღესასწაულს საქართველოს მთავრობის, თავდაცვის ძალების, ასევე ადგილობრივი მუნიციპალიტეტის წარმომადგენლები და საეკლესიო პირები დაესწრნენ.
დიდგორის მემორიალთან შეკრებილი სტუმრებისთვის, კონცერტი და თეატრალური წარმოდგენა გაიმართა. შეკრებილ საზოგადოებას სამეწარმეო და ეთნო კუთხეების დათვალიერების საშუალებაც ჰქონდათ.