ონის მუნიციპალიტეტის მერობის კანდიდატი „ქართული ოცნებიდან“, დავით ლობჟანიძე, საარჩევნო კამპანიის ფარგლებში მოსახლეობასთან შეხვედრებს განაგრძობს.
მერობის კანდიდატმა ორ მნიშვნელოვან მიმდინარე პროექტზე – ქალაქ ონის 24-საათიან წყალმომარაგებასა და მუნიციპალიტეტის სოფლების ბუნებრივი აირით უზრუნველყოფაზე გაამახვილა ყურადღება. მისივე თქმით, განსაკუთრებული ყურადღება დაეთმობა ტურიზმის სფეროს, ინფრასტრუქტურას და ისეთი პროექტების განვითარებას, რაც ახალგაზრდების მუნიციპალიტეტში დარჩენას შეუწყობს ხელს.
„ძირითადი მოთხოვნა თავად ქალაქ ონის მაცხოვრებლებისგან იყო, რომ მათთვის უზრუნველყოფილი ყოფილიყო 24-საათიანი წყალმომარაგება. პროექტი როცა დასრულდება, ქალაქ ონის მოსახლეობა 24-საათიან წყალმომარაგებას მიიღებს.
ახლა მიმდინარეობს პროექტი, რომელიც უზრუნველყოფს მუნიციპალიტეტის სოფლების დიდი ნაწილის გაზმომარაგებას, აღნიშნული პროექტი გაგრძელდება მანამ, სანამ სრულად არ მოხდება გაზიფიცირება მუნიციპალიტეტის ყველა სოფელში.
იქნება რამდენიმე მიმართულება, რასაც ძალიან დიდი ყურადღება უნდა მიექცეს – ეს არის ტურიზმის ხელშეწყობა და განვითარება, ინფრასტრუქტურული სამუშაოების მოწესრიგება და აუცილებლად უნდა განვითარდეს ისეთი პროექტები, რაც ხელს შეუწყობს მუნიციპალიტეტში ახალგაზრდების დარჩენას. ზოგადად, დღეს პრობლემაა რაიონებსა და სოფლებში ახალგაზრდების დამაგრება და ამას ყურადღება უნდა მიექცეს“, – აცხადებს ლობჟანიძე.