გამჭვირვალობის კანონის გაუქმება აგენტურას თავისუფლად პარპაშის საშუალებას მისცემს და ეს ქვეყნისთვის ეგზისტენციალური საკითხია, – განაცხადა პარლამენტის თავდაცვისა და უშიშროების კომიტეტის თავმჯდომარის პირველმა მოადგილემ თენგიზ შარმანაშვილმა გადაცემაში „იმედი LIVE“.
მისივე თქმით, პირველად დაანონსებული კანონის არ მიღების შემდეგ საქართველოში უკონტროლო დაფინანსებების შემოსვლა გაათმაგდა.
„ძალიან მარტივი იყო ჩვენი მხრიდან დავთანხმებულიყავით და გვეთქვა, რომ კარგით, შევაჩერებთ ამ ორი კანონის მოქმედებას და მაშინ საფრთხეს ავირიდებთ მმართველი პარტია და ვიზალიბერალიზაციის პრობლემას არ გამოგაყენებინებთ საშანტაჟოდ, მაგრამ ამას ჩვენ არ გავაკეთებინებდით. იმიტომ, რომ ის კანონმდებლობა წინასაარჩევნო დაპირებებისთვის კი არ მივიღეთ. მართლა ეგზისტენციალური და ქვეყნის უსაფრთხოების საკითხია. თუ საქართველოში მოიშლება გამჭვირვალობის შესახებ კანონმდებლობა, ეს აგენტურას თავისუფლად პარპაშის საშუალებას მისცემს, დაიკარგება ყოველგვარი კონტროლი. ვერც კი გავაკონტროლებთ, ვინ რისთვის და რა პროცესებისთვის ხარჯავს ფულს.
კარგი, არ მივიღეთ პირველად დაანონსებული კანონი და რა მივიღეთ შედეგად? გაათმაგებული დაფინანსება საქართველოში. ამიტომ ავიღეთ უკვე არსებული და ყველაზე გამოცდილი კანონი და ერთი ერთში ვთარგმნეთ, მცირედი შესწორებებით. ჩვენ ვეუბნებით საზოგადოებას, რომ რა, უნდა დავთმოთ ეს ყველაფერი?! იპარპაშოს აგენტურამ და გააკეთებინონ ქართველ პოლიტიკოსებს ის, რაც საქართველოს ინტერესებში არ შედის?! დააფინანსონ ის პროპაგანდა, რომელიც საქართველოს ომში ჩაითრევს?! მივცეთ ამის საშუალება?! კი, ბატონო, მაგრამ ეს ჩვენი ქვეყნის გადარჩენა-არ გადარჩენის საკითხია“, – აღნიშნა შარმანაშვილმა.