რუსეთის ძალების მიერ აზერბაიჯანის სამოქალაქო თვითმფრინავის დაზიანებამ და ინციდენტზე რუსი ოფიციალური პირების რეაქციამ აზერბაიჯანში დიდი იმედგაცრუება და უკმაყოფილება გამოიწვია, – ამის შესახებ აზერბაიჯანის პრეზიდენტმა, ილჰამ ალიევმა ტელეკომპანია „ალ-არაბიასთან“ ინტერვიუში განაცხადა.
ალიევის თქმით, აზერბაიჯანი არასდროს მოითმენს მის მიმართ აგრესიის ან უპატივცემულობის რაიმე ნიშანს ან გამოვლინებას.
„ეს, რა თქმა უნდა, ჩვენს ორმხრივ ურთიერთობებში ძალიან სერიოზული სიტუაციაა. მაგრამ ჩვენ არ გვინდოდა ამ ურთიერთობების გაუარესება. დიახ, ჩვენი ხალხი იმედგაცრუებული, გაბრაზებული, განაწყენებული იყო. ველოდით, რომ ადრე თუ გვიან გამოძიება დასრულდებოდა, მაგრამ შემდეგ დაიწყო ეს უსაფუძვლო თავდასხმები რუსეთში აზერბაიჯანელებზე. ორი ადამიანი აწამეს და მოკლეს, მოგვიანებით გავრცელებულ ოფიციალურ ინფორმაციაში კი ნათქვამი იყო, რომ ისინი გულის შეტევით გარდაიცვალნენ. მაშინაც კი, თუ მათ 20 წლის წინ დანაშაული ჩაიდინეს, როგორც ამბობენ, ისინი ადამიანები არიან. ასე მოპყრობა არ შეიძლება. რა სახის დამოკიდებულებაა ეს? მათ შორის იყვნენ აზერბაიჯანის მოქალაქეები და აზერბაიჯანული წარმოშობის რუსეთის მოქალაქეები. ეს იყო უპრეცედენტო ქმედება ჩვენი ხალხის წინააღმდეგ. ჩვენ არ ვართ პასუხისმგებელი ურთიერთობების გაუარესებაზე. ჩვენ კონსტრუქციულად და სამართლებრივად ვრეაგირებთ, მაგრამ ჩვენ არასდროს მოვითმენთ ჩვენ მიმართ აგრესიის ან უპატივცემულობის რაიმე ნიშანს ან გამოვლინებას“, – თქვა ალიევმა.