შეიძლება ადამიანს ხელი გაუმართოს რაღაც ფონდმა, თუნდაც გადაიხადოს ჯარიმა მაგრამ დანაშაული სხვა რამეშია. ანუ შენ ფინანსური რესურსის მობილიზებას აკეთებ არა იმიტომ, რომ ვინმეს ამოუდგე გვერდში, არამედ შენ თვითონ გეგმავ დანაშაულებს, – განაცხადა პარლამენტის თავმჯდომარის პირველი მოადგილე გიორგი ვოლსკიმ მიმდინარე გამოძიებასთან დაკავშირებით, რომლის შედეგადაც რამდენიმე მდიდარი „ენჯეროს“ სავარაუდო არაკანონიერი საქმიანობის შესახებ გახდა ცნობილი.
მისი თქმით, როგორც აღმოჩნდა ეს ფონდები თანხას აგროვებდნენ იმისთვის, რომ ამავე ფინანსებით წაეხალისებინათ ძალადობა და დესტაბილიზაცია.
„შეიძლება ადამიანს ხელი გაუმართოს რაღაც ფონდმა, თუნდაც გადაიხადოს ჯარიმა. მაგრამ ამოცანა და დანაშაული სხვა რამეში მდგომარეობს. ანუ შენ ფინანსური რესურსის მობილიზებას აკეთებ არა იმიტომ, რომ თუ კი ვინმე ოდესმე იქნება დაჯარიმებული მას ამოუდგე პოლიტიკურად მხარში, არამედ შენ თვითონ გეგმავ დანაშაულებს, შენ თვითონ გეგმავ დესტაბილიზაციას, შენ გეგმავ ექსტრემიზმს, შენ გეგმავ სისხლისღვრას და ამისთვის ფინანსურ რესურსს უყრი თავს. დღეს ღიად აცხადებენ, რომ პიროტექნიკის შესყიდვა კვლავაც იქნება დღის წესრიგში, კვლავაც ესვრიან პოლიციელებს“, – განაცხადა გიორგი ვოლსკიმ.
„იმედისთვის“ ცნობილი ხდება „საქართველოს დემოკრატიული ინიციატივის“ და „ნანუკას ფონდის“ მიერ რადიკალების სამართალდარღვევის გამო გადახდილი ჯარიმების შესახებ. საქმის მასალებით ირკვევა, რომ „საქართველოს დემოკრატიულმა ინიციატივამ“, რომლის თავმჯდომარე ედუარდ მარიკაშვილია, პატიმრებისა და მათი ოჯახებისთვის 100 000 ლარამდე გადაიხადა. ასევე, ცნობილია „ნანუკას ფონდის“ მიერ გადახდილი თანხის ოდენობა, რომელიც ქველმოქმედების საფარქვეშ ახალისებდა ძალადობას. ფონდის მიერ ადმინისტრაციული სამართალდარღვევის გამო ფიზიკური პირებისათვის გამოწერილი ჯარიმების დასაფარად ან პატიმრებისა და მათი ოჯახებისთვის გადარიცხული თანხები 300 000 ლარს აღემატება. ეს არის მხოლოდ ორი მაგალითი იმისა, თუ რა სქემით მუშაობდა თითქმის ყველა „ენჯეო”, ისევე, როგორც ე.წ. საქველმოქმედო ფონდები.