ბოიკოტში მყოფ რვა ოპოზიციურ პარტიას შორის, დაპირისპირება კიდევ უფრო გამწვავდა. მიზეზებზე თამარ ჩერგოლეიშვილი “კურიერთან” საუბრობს და ამტკიცებს, რომ მიხეილ სააკაშვილის პარტიასთან ურთიერთობა 2016 წლის შემდეგ აღარ აქვს და ამ წლების განმავლობაში მსჯავრდებული ექსპრეზიდენტი მის განულებას ცდილობს.
დახურულ ჯგუფზე, რომელიც, ჩერგოლეიშვილის ინფორმაციით, “ნაციონალურმა მოძრაობამ” თავად დატოვა, დღეს მიხეილ სააკაშვილის პარტიაში არაფერი თქვეს. გაავრცელეს განცხადებაც და ისევ დაგმეს “ფედერალისტების” ერთ-ერთი ლიდერის მიერ სოციალურ ქსელში დაწერილი კომენტარები.
ოპონენტებად ქცეულ ყოფილ კოლეგებს შორის დაპირისპირება უინტერესოა ხაზარაძე-ჯაფარიძის გუნდისთვის. ბოიკოტში დარჩენილებს უსაგნო ქცევაზე მიუთითებენ, თავად კი არჩევნებისთვის ემზადებიან.
“ნაციონალურ მოძრაობასა” და “ფედერალისტებს” შორის დაპირისპირება არ უკვირთ მმართველ გუნდში. “ქართული ოცნება” გარე ძალებზეც საუბრობს. სახელისუფლებო პარტიაში მიიჩნევენ, რომ ოპოზიცია დავალებებს ქვეყნის ფარგლებს გარედან იღებს და დაპირისპირებაც სწორედ იმ სცენარის ერთ-ერთი ნაწილია, რომელიც ქვეყნის ფარგლებს გარეთ დაიწერა.
ოპოზიციურ პარტიებს შორის კიდევ ერთი დაპირისპირება რამდენიმე დღის წინ დაიწყო.