ძალიან დიდი სურვილი მაქვს, რომ გარედან არ ვუგულშემატკივრო ჩემი ქალაქის გალამაზებას, უკეთეს მომავალს და საქმით მივიღო ამაში მონაწილეობა, – განაცხადა „დღის ქრონიკაში“ „ქართული ოცნების“ მაჟორიტარობის კანდიდატმა ვაკეში, ბექა გელენავამ.
მან საარჩევნო პერიოდში მოსახლეობასთან შეხვედრების დროს გამოვლენილ პრობლემებზე ისაუბრა.
„ჩემი სამაჟორიტარო ოლქი რელიეფურად ძალიან განსხვავებულია. აქედან გამომდინარე, პრობლემები და გამოწვევებიც სხვადასხვაა. პირობითად, თუ ვაჟა-ფშაველას კვარტლებსა და ნუცუბიძის პლატოებზე მთავარი გამოწვევაა ლიფტების ჩანაცვლება, მეტი სკვერის მოწყობა, მაგალითად, სოფელ თხინვალში სხვა პრობლემა იყო და ძალიან დიდი სამუშაოები ჩატარდა, ამისთვის კახა კალაძეს დიდი მადლობა – უკვე მიეწოდა წყალი, მოეწყო ინფრასტრუქტურა, გამაგრდა კედლები, თუმცა გამოწვევები რჩება.
მოსახლეობასთან შეხვედრები უკვე დავიწყეთ. ნაყოფიერი შეხვედრები გვაქვს, მოსახლეობა ჩართულია, გვიზიარებს თავის აზრს, თავის იდეებს. მოკლედ, მონაწილე არიან იმის, რომ გაგვაცნონ თავისი პრობლემები და ჩვენი მიზანია, რაც შეიძლება მალე დავიწყოთ ამ პრობლემების მოგვარება.
რა თქმა უნდა, ყველა პრობლემის ერთი ხელის მოსმით მოგვარება შეუძლებელია, რადგან რაც არ უნდა გაკეთდეს, აუცილებლად გამოჩნდება რაღაც ახალი გასაკეთებელი და ჩვენ ამისთვის მზად ვართ“, – განაცხადა ბექა გელენავამ.