აშშ-ის პრეზიდენტის, დონალდ ტრამპის საჯარო გულგრილობამ პოლონეთში რუსული დრონების შეჭრის მიმართ ევროპაში შეშფოთება გააძლიერა, – წერს საინფორმაციო სააგენტო Reuters-ი.
„მიმდინარე კვირაში პოლონეთის საჰაერო სივრცეში თითქმის 20 დრონის გამოჩენამ ღრმა შფოთვა გამოიწვია ნატოს წევრ ქვეყნებში, რომლებმაც უკრაინაში ომის დაწყების შემდეგ პირველად გაუხსნეს ცეცხლი რუსულ სამიზნეს“, – ნათქვამია სტატიაში.
ევროპელი დიპლომატების თქმით, ისევე როგორც დრონების გამოჩენა, საგანგაშო იყო აშშ-ის პრეზიდენტის, დონალდ ტრამპის უარი, რომ საჯაროდ პასუხისმგებლობა დაეკისრებინა მოსკოვისთვის ოთხშაბათს მომხდარი ინციდენტის გამო.
ამასთან, აშშ-ს მონაწილეობა არ მიუღია დრონების მოგერიებაში.
„ალიანსის ბევრი წევრი ქვეყანა ისედაც ეჭვქვეშ აყენებს ტრამპის მზაობას, რომ დაიცვას ისინი რუსეთის რეალური თავდასხმის შემთხვევაში“, – აღნიშნულია სტატიაში.
ტრამპის თავშეკავებული პასუხი ბევრისთვის მისი პოლიტიკის – „ამერიკა უპირველეს ყოვლისა“ – კიდევ ერთი მაგალითი იყო. ეს პოლიტიკა ევროპელ მოკავშირეებს მოუწოდებს, რომ საკუთარ უსაფრთხოებაზე მეტი პასუხისმგებლობა აიღონ და თავად დაფარონ რუსეთისგან თავდაცვის ხარჯები.
თუმცა, ზოგიერთი ანალიტიკოსის თქმით, შესაძლოა, ტრამპი თავს არიდებდეს ვლადიმირ პუტინის გაღიზიანებას, რომელიც, მათი განცხადებით, უკრაინაში შეჭრიდან სამნახევარი წლის შემდეგ, შესაძლოა, ნატოს სამხედრო შესაძლებლობებს და აშშ-ის სიმტკიცეს ცდიდეს.
„ეს შემთხვევა კიდევ ერთხელ უსვამს ხაზს იმას, რომ ტრამპი, რუზველტის შემდეგ ყველა სხვა პრეზიდენტისგან განსხვავებით, არ მიიჩნევს ევროპის უსაფრთხოებას ამერიკის უსაფრთხოებისთვის ფუნდამენტურად“, – თქვა ივო დაალდერმა, რომელიც 2009-2013 წლებში აშშ-ის ელჩი იყო ნატოში, ახლა კი ჰარვარდის ბელფერის ცენტრის უფროსი მკვლევარია.