ხელოვნური პროტესტის ორგანიზების სქემა – „იმედის კვირის“ დაანონსებულ თემას დიდი რეზონანსი მოჰყვა. ჟურნალისტები ანუკი გუმბერიძე და სანდრო გამსახურდია გიჩვენებენ დეტალურ გეგმას – როგორ მუშაობენ უცხო ქვეყნის სპეცსამსახურები საქართველოში. მაყურებელი პირველად, „იმედის კვირის“ ეთერით გაიგებს, როგორ იმართება პროტესტი.
ვინ არიან საპროტესტო აქციების რეალური ორგანიზატორები, საიდან, რა სქემით ფინანსდებიან და რომელ უნივერსიტეტებს აქვთ საკუთარ თავზე აღებული რადიკალური ჯგუფების მომზადება და პროვოკაციების მოწყობა.
მაყურებელი მოისმენს კონკრეტულ სახელებს და გვარებს. „იმედის კვირისთვის“ ცნობილი გახდა ყველა იმ ახალგაზრდული ორგანიზაციის წევრების, უნივერსიტეტების მფლობელების, ლექტორების და რექტორების კავშირები უცხო ქვეყნის სპეცსამსახურებთან და იმ ადამიანის ვინაობა, რომელიც ამ პროცესებს კურირებს.
მაყურებელი ნახავს კონკრეტულ მტკიცებულებებს კოლოსალურ თანხებზე, ანტისახელმწიფოებრივი შინაარსის ტრენინგებზე, უცხოელი დიპლომატების როლზე და საქართველოს უნივერსიტეტის საეჭვო ტრანზაქციებზე.
„იმედის კვირამ“ თემაზე მუშაობის პროცესში მიმართა შესაბამის უწყებას, სადაც დაადასტურეს, რომ სახელმწიფო უსაფრთხოების სამსახურში ნამდვილად მიმდინარეობს გამოძიება და ამ ეტაპზე მასალების შესწავლა და ინფორმაციის დამუშავება ხდება. გამოძიება დაწყებულია 194-ე მუხლის მე-3 ნაწილით.