ეს სხვა არაფერია, თუ არა ძალადობისთვის მწვანე შუქის ანთება, – განაცხადა საქართველოს პარლამენტის თავმჯდომარემ შალვა პაპუაშვილმა ელენე ხოშტარიას საქმესთან დაკავშირებით ევროკომისიის პოზიციის შეფასებისას. მისი თქმით, ელენე ხოშტარიამ პოლიტიკურად მოტივირებული დანაშაული ჩაიდინა.
„ელენე ხოშტარია არის ადამიანი, რომელიც უარს ამბობს დემოკრატიულ პროცესში მონაწილეობაზე და გაცხადებული მიზანი აქვს, რომ შეუზღუდოს მოქალაქეებს არჩევნების გზით ნების გამოვლენა და ჩაშალოს დემოკრატიული არჩევნები. რა თქმა უნდა, როდესაც ჩვენ ვხედავთ, რომ ევროკავშირის ერთ-ერთი ინსტიტუციის პრესსპიკერი მხარდაჭერას უცხადებს ასეთ ადამიანს, ეს სხვა არაფერია, თუ არა ძალადობისთვის მწვანე შუქის ანთება. ფაქტობრივად, რაც ჩვენ მოვისმინეთ პრესსპიკერის მხრიდან, ეს არის პოლიტიკურად მოტივირებული ძალადობის და დანაშაულის გამართლება და პოლიტიკურად მოტივირებული დანაშაულისთვის მწვანე შუქის ანთება”, – განაცხადა შალვა პაპუაშვილმა.
მას მიაჩნია, რომ შემდგომში ამ ჯგუფების მხრიდან პოლიტიკურად მოტივირებულ დანაშაულსა და ძალადობაზე პასუხისმგებლობა ევროკავშირის თუ ბრიუსელის შესაბამისმა ინსტიტუციებმა უნდა აიღონ.
„ამას იქეთ, ყველა ამგვარ პოლიტიკურად მოტივირებულ დანაშაულსა თუ ძალადობაზე, რომელიც წამოვა ამ ჯგუფებისგან, ყველაფერზე პასუხისმგებლობა უნდა აიღონ ევროკავშირის თუ ბრიუსელის შესაბამისმა ინსტიტუციებმა, მათ შორის ევროკავშირის საელჩომ, რომელიც დღემდე არ ემიჯნება ძალადობას, მათ შორის, იმ მოძალადეებს, რომლებსაც თავად აფინანსებს.
შეგახსენებთ, სულ ახლახან ცნობილი გახდა, რომ ევროკავშირის საელჩო აფინანსებს ადამიანს, რომელიც მოუწოდებს პოლიტიკურად მოტივირებული მკვლელობისკენ და რომელიც ქილიკობს საქართველოს თანამედროვე ისტორიაში ერთ-ერთი გამორჩეული პოლიტიკოსის, ლევან გაჩეჩილაძის გარდაცვალებაზე. ასეთ ადამიანს აფინანსებს ევროკავშირის საელჩო და საზოგადოებას იმის ღირსადაც კი არ მიიჩნევს, რომ წუხილი მაინც გამოთქვას, ერთი სიტყვა მაინც გაგვაგონოს, საერთოდ, ეს რამენაირად არა თუ ევროპულ, გალაქტიკის ღირებულებებში მაინც თუ ჯდება, როდესაც ადამიანი პოლიტიკურად მოტივირებული მკვლელობისკენ მოუწოდებს და ამას აფინანსებს ევროკავშირის მოქალაქის ფულით. სამწუხაროა, თუმცა, ამ მდგომარეობაში თავად ბრიუსელმა მიიყვანა საკუთარი თავი, რომ ის თავს აიგივებს ძალადობასთან და პოლიტიკურად მოტივირებულ დანაშაულთან”, – განაცხადა შალვა პაპუაშვილმა.
ევროკომისია ელენე ხოშტარიას დასაცავად გამოვიდა – კანონდარღვევაზე არაფერს ამბობენ და ბრიუსელიდან პირდაპირ პატიმრების გათავისუფლებას ითხოვენ. ასევე, გამოყენებულია ტერმინი „პოლიტიკური პატიმარი“. ევროკომისიის პრეს-სპიკერი აცხადებს რომ ევროკავშირი მხარს უჭერს ელენე ხოშტარიას.