რამდენიმე ევროპული საელჩო პირდაპირაა ჩართული, სამწუხაროდ, საქართველოში რადიკალიზმის გაღვივებაში, შესაბამისად, ხშირად ხვდებიან რადიკალებს და ეს არის სამწუხარო მოვლენა, – განაცხადა პრემიერ-მინისტრმა ირაკლი კობახიძემ ჟურნალისტის კითხვის პასუხად, რომელიც ბრიტანეთის საელჩოში გიგა ბოკერიას და გია ბარამიძის მონაწილეობით გამართულ შეხვედრას შეეხებოდა.
მისივე თქმით, ეს ყველაფერი აზიანებს ევროკავშირისა და ევროპული ბიუროკრატიის იმიჯს საქართველოში.
„ევროკავშირის, ევროპული ქვეყნების იმიჯს საქართველოში ეს ძალიან აზიანებს. თან, როდესაც ხვდები არჩევნებთან დაკავშირებით ისეთ პარტიებს, რომლებიც საერთოდ არ მონაწილეობენ არჩევნებში, ეს კიდევ უფრო მეტად გაუგებარია. ძალიან ცუდია, როდესაც კონკრეტული ელჩები, საელჩოები ახალისებენ საქართველოში რადიკალიზმს. საზოგადოება ამას აკვირდება, აფასებს და ეს ყველაფერი ევროპული ქვეყნების, ევროპული ბიუროკრატიის იმიჯზე საქართველოში ძალიან ცუდად აისახება,“- განაცხადა პრემიერმა.