ერთადერთი გზა, რაც რადიკალურმა ოპოზიციამ დაიტოვა, არის ექსტრემიზმი. ეს არის გარე მითითებების მიყოლის შედეგი. აი, ამ მდგომარეობაში ჩააყენეს მათ, ვინც წაახალისეს, რომ მანდატები დაეტოვებინათ პარლამენტში, ესაუბრათ არჩევნების გაყალბებაზე, – განაცხადა შალვა პაპუაშვილმა.
პარლამენტის თავმჯდომარემ აღნიშნა, რომ ოპოზიციამ არჩევნების გაყალბების ფაქტები ვერ წარმოადგინა, რადიკალებს შიდა ტერორისტები უწოდა და დასძინა, რომ ქვეყანაში 90-იანი წლების დაბრუნების მცდელობისთვის ყველას საკადრისი პასუხი გაეცემა.
„ერთი წელი გადის უკვე საპარლამენტო არჩევნებიდან. ქვეყანა შეაყრევინეს გარედან და დღემდე ვერ დადეს არჩევნების გაყალბების რაიმე სანდო მტკიცებულება. შეგახსენებთ, არჩევნების დღემდე საერთოდ არ ჰქონდათ პრეტენზია ან რაიმე მნიშვნელოვანი პრეტენზია წინასაარჩევნო გარემოსთან დაკავშირებით, არჩევნების დღესაც არანაირი მნიშვნელოვანი პრეტენზია არ ჰქონდათ. მხოლოდ შედეგის გაგების შემდეგ დაიწყეს ფიქრი და იქაც ვერაფერი მოიფიქრეს, თქვეს, რომ რუსეთი ჩაერია, შემდეგ 5 დღე იფიქრეს და ხან გაჟონვა თქვეს და ხან თურმე ვიღაც ორჯერ იყენებდა პირადობის მოწმობას. ყველაფერი ტყუილი აღმოჩნდა.
აი ამ ტყუილში ჩააგდებინეს მათმა უცხოელმა მფარველებმა თავი. 61 მანდატი ჰქონდა ოპოზიციას და უმეტესობაზე უარი თქვეს, გახარიას პარტიის გარდა. ათქმევინეს უარი მანდატებზე, გააგდეს ქუჩაში, წვიმასა და თოვლში და არიან ქუჩაში. უკვე არც მხარდამჭერი ჰყავთ, არც გულშემატკივარი. ერთადერთი გამოსავალი მათთვის არის ესკალაცია. ეს არის ყველაზე საშიში გზა.
მინდა გავაფრთხილო ის პარტიები და „ენჯეოები“, რომლებიც ამ ესკალაციაში არიან ჩართულები, გავაფრთხილო ის უცხოელები, რომლებიც ამ ფაქტს აკნინებენ და ნორმალიზებას უკეთებენ – პასუხისმგებლობა ნებისმიერი სახის ექსცესზე მათ მხრებზე იქნება. სახელმწიფო არავის მისცემს იმის საშუალებას, რომ აქ 90-იანი წლები დაატრიალოს, რასაც ახლა „ნაციონალური მოძრაობა“ თავისი გარე გულშემატკივრებით აპირებს. ვეღარავინ გაექცევა პასუხისმგებლობას. ჩუმად ვერცერთი უცხოელი იქნება ამ შემთხვევაში. ყველას, ვინც ასეთ შიდა ტერორისტთან სალონურ ურთიერთობაშია, საჯაროდ ვკითხავთ, რა არის მათი პოზიცია და ყველამ უნდა იგრძნოს პასუხისმგებლობა“, – განაცხადა პაპუაშვილმა.