აშშ-ის პრეზიდენტმა, დონალდ ტრამპმა გაერო მიგრაციის კრიზისის დაფინანსებაში დაადანაშაულა.
გაეროს გენერალური ასამბლეისადმი მიმართვისას ტრამპმა განაცხადა, რომ გაერო არა მხოლოდ ვერ აგვარებს არსებულ პრობლემებს, არამედ ახალსაც ქმნის.
„გაერო არა მხოლოდ ვერ აგვარებს პრობლემებს, არამედ ძალიან ხშირად ის ქმნის ახალ პრობლემებს, რომლებიც ჩვენ უნდა მოვაგვაროთ“, – განაცხადა ტრამპმა.
მისი თქმით, ამის საუკეთესო მაგალითია „ჩვენი დროის უმთავრესი პოლიტიკური საკითხი – უკონტროლო მიგრაციის კრიზისი“.
„თქვენი ქვეყნები ინგრევა. გაერო აფინანსებს დასავლეთის ქვეყნებსა და მათ საზღვრებზე თავდასხმას“, – დასძინა ტრამპმა.
აშშ-ის პრეზიდენტმა ასევე განაცხადა, რომ გაეროს დახმარება მიგრანტებს აშშ-ში უკანონო შესვლაში უწყობს ხელს – „შემდეგ კი მათი გაყვანა გვიწევს. გაერომ უკანონო მიგრანტებს ასევე მიაწოდა საკვები, თავშესაფარი, ტრანსპორტი და სადებეტო ბარათები“.
ტრამპის განცხადებით, გაერომ ქვეყნები „შემოსევებისგან“ უნდა დაიცვას და „არა შექმნას და დააფინანსოს ისინი“.