“დონალდ ტრამპს მშვიდობის დარგში ნობელის პრემია თუ სურს ღაზაში ომი უნდა დაასრულოს”

დონალდ ტრამპს მშვიდობის დარგში ნობელის პრემია თუ სურს, ღაზაში ომი უნდა დაასრულოს, – ამის შესახებ საფრანგეთის პრეზიდენტმა, ემანუელ მაკრონმა განაცხადა.

მაკრონის თქმით, ამისთვის ის საფრანგეთზე უკეთეს მდგომარეობაშია.

ფრანგულ სატელევიზიო არხ BFM TV-თან საუბრისას საფრანგეთის პრეზიდენტმა აღნიშნა, რომ მხოლოდ ტრამპს აქვს ძალა, ღაზაში ომის დასრულების მიზნით, ისრაელზე ზეწოლა მოახდინოს.

„არსებობს ერთადერთი ადამიანი, ვისაც შეუძლია ამის გაკეთება და ეს არის აშშ-ის პრეზიდენტი დონალდ ტრამპი. რატომ შეუძლია მას ამის გაკეთება ჩვენზე მეტად? იმიტომ, რომ ჩვენ არ ვაწვდით იარაღს, რომელიც საშუალებას იძლევა ღაზაში ომის წარმოებისთვის. ჩვენ არ ვაწვდით აღჭურვილობას, რომელიც საშუალებას იძლევა ღაზაში ომის წარმოებისთვის. ამერიკის შეერთებული შტატები აკეთებს ამას. მე ვხედავ ამერიკის პრეზიდენტს, რომელმაც დღეს დილით გაერო-ს გენერალური ასამბლეის ტრიბუნიდან თქვა: „მე მინდა მშვიდობა. მე მოვაგვარე შვიდი კონფლიქტი“, რომელსაც სურს ნობელის პრემია მშვიდობის დარგში. ნობელის პრემია მშვიდობის დარგში მხოლოდ იმ შემთხვევაშია შესაძლებელი, თუ თქვენ ამ კონფლიქტს დაასრულებთ და ამიტომ, ჩვენ უნდა მოვახდინოთ ზეწოლა ისრაელის მთავრობაზე, რათა შეწყვიტოს, დაასრულოს კონფლიქტი ღაზაში, რათა საბოლოოდ გავათავისუფლოთ 48 მძევალი, რათა საბოლოოდ შევძლოთ ჰუმანიტარული დახმარების მარშრუტების გახსნა, გადავარჩინოთ ბავშვების, ქალების, მამაკაცების და მოხუცების სიცოცხლე“, – განაცხადა მაკრონმა.