მოლდოვის საპარლამენტო არჩევნების დროს ეგზიტპოლები არ ჩატარდება. შესაბამისი გადაწყვეტილება ქვეყნის ცენტრალურმა საარჩევნო კომისიამ მიიღო. როგორც კომისიის პრესსამსახურში განაცხადეს, კომისიამ ჩატარებულ სხდომაზე უარი უთხრა კომპანია Date inteligente-ს ხმის მიცემის დღეს სოციოლოგიური გამოკითხვის ჩატარების ნებართვის გაცემაზე.
მოლდოვური მედიის ცნობით, კომისიის თავმჯდომარის მოადგილემ, პავლ პოსტიკამ გადაწყვეტილება კომპანიის დაფინანსების წყაროებთან და პროექტის განხორციელების მოტივაციასთან დაკავშირებული საფუძვლიანი ეჭვებით ახსნა.
უკანასკნელად ეგზიტპოლი მოლდოვაში 2020 წლის საპრეზიდენტო არჩევნების მეორე ტურის დროს ჩატარდა. მაშინ ორგანიზაციებმა Spero-მ და Intellect Group-მა ორგანიზება გაუწიეს გამოკითხვას მოლდოვის 100 საარჩევნო უბანზე. ამის შემდეგ ცესკო-სთვის ეგზიტპოლების ჩატარების თხოვნით არავის მიუმართავს.
მოლდოვაში საპარლამენტო არჩევნები 28 სექტემბერს გაიმართება.