„ქართული ოცნების“ მაჟორტარობის კანდიდატმა დიდ დიღომში, ვაშლიჯვარსა და სოფელ დიღომში შალვა პერანიძემ „დღის ქრონიკაში“ ძირითად გამოწვევებზე ისაუბრა, რაც მის სამაჟორიტარო ოლქში დგას მოსახლეობის წინაშე.
„ბოლო სამი წელი ვმუშაობდი მაჟორიტარი დეპუტატის ბიუროს ხელმძღვანელად და კარგად ვიცი ის გამოწვევები, რაც არსებობს ჩვენს ოლქში. დიდ დიღომში მაგალითად გვაქვს ბაღების და სკოლების პრობლემა, რაც გამომდინარეობის იქიდან, რომ ძალიან სწრაფად იზრდება მოსახლეობა ჩვენს უბანში. სოფელ დიღომში განსაკუთრებული პრობლემა გვაქვს, კანალიზაციის და შიდა გზების მოწესრიგებასთან დაკავშირებით. რაც შეეხება ვაშლიჯვარს, ცენტრალური, გოძიაშვილის ქუჩა რეაბილიტაციას საჭიროებს. მიუხედავად იმისა, რომ ამ მიმართულებით ბოლო წლების განმავლობაში ძალიან ბევრი გაკეთდა, მაინც რჩება გამოწვევები და ამ გამოწვევებისთვის მზად ვართ, რომ ვიმუშაოთ და ერთობლივად დავძლიოთ ეს გამოწვევები.
ამომრჩეველთან შეხვედრების დროს, პირველ რიგში რაც გამოიკვეთა, დიდ დიღომში საჭიროა ახალი ბაღი და სკოლა. როგორც იცით ბაღების საკითხის მოგვარება თბილისის მერიის დაქვემდებარებაშია და უკვე მქონდა საუბარი თბილისის მერთან. მზაობა გვაქვს, რომ ახალი ბაღი ავაშენოთ, რისთვისაც გამოიძებნება ადგილი. იმედი მაქვს, რომ უახლოეს პერიოდში სკოლის საკითხიც გადაწყდება. რაც შეეხება ინფრასტრუქტურას, ძალიან სავალალო მდგომარეობაშია სოფელი დიღმიდან ვაშლიჯვარში გადასასვლელი ხიდი და ჩემი ინფორმაციით, გამოცხადებულია ტენდერი და ამ ხიდის რეაბილიტაცია სულ მალე დაიწყება“, – აღნიშნა პერანიძემ.