გლდანის ციხის უფროსის ყოფილი მოადგილის ალექსანდრე ჯანჯღავას თქმით, ციხის იმდროინდელი უფროსის ალექსანდრე მუხაძის დავალებით ჯაშუშობის ბრალდებით დაკავებულ ფორტორეპორტიორებთან კონტრდაზვერვის თანამშრომლები უსაშვოდ შედიოდნენ.
ამის შესახებ ჯანჯღვამ საქალაქო სასმართლოში მოწმედ დაკითხვაზე დღეს განაცხადა.
“ფოტორეპორტიორების საქმეზე” უკვე დაიკითხნენ საქმის ფიგურანტები გიორგი აბდალაძე, ზურაბ ქურციკიძე, ირაკლი და ნათია გედენიძეები.
მთავარმა პროკურატურამ “ფოტორეპორტიორების საქმეზე” ძალადობით და დაზარალებულის პირადი ღირსების შეურაცხყოფით განხორციელებული სამსახურებრივი მდგომარეობის გადამეტების ფაქტზე შსს კონტრდაზვერვის დეპარტამენტის თბილისის ტერიტორიული სამმართველოს უფროსის ყოფილი მოადგილე დავით დევნოზაშვილი დააკავა, ხოლო სასჯელაღსრულების დაწესებულების N8 საპყრობილის ყოფილი დირექტორის ალექსანდრე მუხაძის მიმართ გამოტანილ იქნა დადგენილება მისი ბრალდების შესახებ. ალექსანდრე მუხაძე ამ დრომდე ძებნაშია.
პროკურატურამ ე.წ ფოტოგრაფების საქმე 2016 წლის 6 ივნისს გახსნა. უწყების განცხადებით, ფოტოგრაფების: გიორგი აბდალაძის, ზურაბ ქურციკიძის და ირაკლი გედენიძის დაკავება გამოგონილი ჯაშუშობის ბრალდებით მოხდა და მათზე ხელისუფლების მხრიდან ანგარიშსწორება 26 მაისის აქციის დაშლის აქტიური გაშუქების გამო მოხდა.
პარალელურად, საქართველოს მთავარი პროკურატურის მოთხოვნის საფუძველზე, ფოტორეპორტიორების განაჩენის გადასინჯვისა და მათთვის გამამართლებელი განაჩენის გამოტანის მოთხოვნით, სააპელაციო სასამართლოში საქმის განხილვა მიმდინარეობს.