პენტაგონში წლების განმავლობაში მომუშავე ჟურნალისტებმა ოთხშაბათს საშვები ჩააბარეს და შენობა დატოვეს მას შემდეგ, რაც თავდაცვის მდივნის, პიტ ჰეგსეტის ახალი შეზღუდვები ძალაში შევიდა. ინფორმაციას ამის შესახებ ტელეკომპანია CNN-ი ავრცელებს.
ამერიკის თითქმის ყველა მსხვილმა საინფორმაციო საშუალებამ პენტაგონის ახალი პოლიტიკა მიუღებლად მიიჩნია.
„დღეს თავდაცვის დეპარტამენტმა ჩამოართვა საშვები პენტაგონის ჟურნალისტებს ამერიკის თითქმის ყველა მსხვილი მედია ორგანიზაციიდან“, – ნათქვამია პენტაგონის პრესის ასოციაციის განცხადებაში.
„ეს გაკეთდა იმიტომ, რომ ჟურნალისტებმა უარი თქვეს ხელი მოეწერათ ახალ მედია პოლიტიკაზე, რომელიც გულისხმობდა ეროვნული უსაფრთხოების შესახებ რეპორტაჟების კრიმინალიზაციის იმპლიციტურ საფრთხეს და მისი ხელმომწერების პოტენციური სამართლებრივი დევნის წინაშე დაყენებას“, – აღნიშნულია განცხადებაში.
მედიის წარმომადგენლებმა დიდი ხნის სამუშაო სივრცეებიდან ყუთები და აღჭურვილობა გაიტანეს.
„პენტაგონის პრესის ასოციაციის წევრები კვლავაც მზად არიან გააშუქონ აშშ-ის სამხედრო საქმიანობა. მაგრამ ნუ შეგეშლებათ, დღევანდელი დღე, 2025 წლის 15 ოქტომბერი, არის ბნელი დღე პრესის თავისუფლებისთვის, რაც ზრდის შეშფოთებას მმართველობაში გამჭვირვალობის, პენტაგონში საჯარო ანგარიშვალდებულებისა და ყველასთვის სიტყვის თავისუფლების მიმართ აშშ-ის ვალდებულების შესუსტების გამო“, – ხაზგასმით აღნიშნეს პრესის ასოციაციაში.
ახალი წესები უკრძალავს ჟურნალისტებს პენტაგონის უმეტეს ნაწილში შესვლას ოფიციალური ესკორტის გარეშე. ეს მნიშვნელოვნად ზღუდავს მათ შესაძლებლობას, თავისუფლად გადაადგილდნენ და მოიპოვონ ინფორმაცია.
პენტაგონი ჟურნალისტებს სთხოვდა, ხელი მოეწერათ დოკუმენტზე, რომლითაც ისინი „აღიარებდნენ“ ამ პოლიტიკას. მედია ორგანიზაციებმა უარი თქვეს ხელმოწერაზე, რადგან მიაჩნიათ, რომ ეს ნიშნავს იმის აღიარებას, რომ ნებისმიერი არაოფიციალური ინფორმაციის გავრცელება ეროვნული უსაფრთხოებისთვის ზიანის მომტანია.