„ზაფხულის სეზონისთვის სასტუმროებში უსაფრთხოების ზომების კონტროლი გამკაცრდება, რაზეც წელს განსაკუთრებით იზრუნებს საგანგებო სიტუაციათა მართვის სააგენტო“, – ამის შესახებ საგანგებო სიტუაციების სააგენტოს დირექტორმა ზვიად ქაწაშვილმა განაცხადა.
სააგენტოს ხელმძღვანელმა ორი წლის წინ ქობულეთში, ერთ-ერთ სასტუმროში მომხდარი ტრაგიკული შემთხვევაც გაიხსენა.
„სახანძრო უსაფრთხოების კუთხით მეტი ყურადღებაა საჭირო. ამისთვის ჩვენი სამსახური უკვე ზრუნავს. ყველა სასტუმრო შემოწმებულია და მათზე პირველი რეკომენდაციები გაცემულია, რომელიც მათი მხრიდან უნდა იყოს გათვალისწინებული. მიცემულია გონივრული ვადები, რათა სახანძრო უსაფრთხოება გამოსწორდეს. ხოლო თუ ამ ვადებში დარღვევები არ გამოასწორეს, ისინი დაჯარიმდებიან. ეს სავალდებულოა და მაქსიმალური სიმკაცრით გაკონტროლდება“- განაცხადა საგანგებო სიტუაციათა მართვის სააგენტოს ხელმძღვანელმა.