“საზოგადოებრივი მაუწყებლის” სამეურვეო საბჭოს წევრის შესარჩევ კომისიას თინათინ რუხაძე უხელმძღვანელებს

დღეს საზოგადოებრივი მაუწყებლის სამეურვეო საბჭოს წევრის შესარჩევი კომისიის პირველი სხდომა გაიმართა. ცნობილია, რომ კომისიას თინათინ რუხაძე უხელმძღვანელებს. ინფორმაციას 1tv.ge ავრცელებს.

პარლამენტმა საზოგადოებრივი მაუწყებლის სამეურვეო საბჭოს წევრობის კანდიდატის შესარჩევი საპარლამენტო საკონკურსო კომისიის შემადგენლობა 2 ივნისს დაამტკიცა.

9 წევრისაგან დაკომპლექტებული კომისია, რომელიც ძირითადად სამოქალაქო საზოგადოებისა და აკადემიური წრეების წარმომადგებლებისგან შედგება, ბორდის წევრობის 3 კანდიდატს შეადგენს. კანდიდატურებიდან ერთ-ერთს კი თანამდებობაზე უკვე პარლამენტი დაამტკიცებს.

სამეურვეო საბჭოს  წევრობის მეურვეობის კანდიდატის შესარჩევი საპარლამენტო-საკონკურსო კომისიის შემადგენლობაში არიან:

სოსო გალუმაშვილი – საზოგადოებასთან ურთიერთობის კონსულტანტი, პიარ-სააგენტო „ჯეპრას“ დამფუძნებელი და ხელმძღვანელი, ქართულ-ამერიკული უნივერსიტეტის პიარ-სკოლის დამფუძნებელი და ლექტორი;

თინათინ თვალაძე – ბლოგერი;

ზურაბ მხეიძე -ფსიქოლოგი;

თინათინ რუხაძე – მოსწავლე ახალგაზრდობის ეროვნული სასახლის დირექტორი;

არნოლდ სტეფანიანი – არასამთავრობო ორგანიზაცია „მრავალეროვანი საქართველოს“ თავმჯდომარე;

ოთარ ტატიშვილი – ექიმი და ტელეწამყვანი;

ბასა ფოცხიშვილი – რეჟისორი, „სტუდია 1 2 3“-ის დამფუძნებელი;

მარინე შიდაშვილი – თბილისის სახელმწიფო უნივერსიტეტის სოციალურ და პოლიტიკურ  მეცნიერებათა ფაკულტეტის პროფესორი;

თამაზ ჯოლოგუა – თბილისის სახელმწიფო უნივერსიტეტის სოციალურ და პოლიტიკურ მეცნიერებათაფაკულტეტის ჟურნალისტიკის მიმართულების ასოცირებული პროფესორი.

საზოგადოებრივი მაუწყებლის სამეურვეო საბჭოს წევრის ვაკანტურ თანამდებობაზე კონკურსი 29 მაისს გამოცხადდა.