2012 წლამდე წამება სისტემური ხასიათის იყო და მეთოდების შემოქმედებაში ადამიანები აბსოლუტურად შეუზღუდავი იყვნენ, – ამის შესახებ ” სამოქალაქო ჩართულობის ცენტრის” დამფუძნებელმა, ლევან გოგიჩაიშვილმა გადაცემა 2030-ში სტუმრობისას განაცხადა.
“წამებას კონკრეტული პოლიტიკური ამოცანა ჰქონდა და სანქცირებული იყო მაღალი პოლიტიკური თანამდებობის პირების მიერ. წამება ხდებოდა ყოველდღიურად და – ყველა დაწესებულებაში. მიზანი იყო მასობრივი შიშის დათესვა, პოლიტიკურ ოპონენტებზე ზემოქმედება, უკანონო სამართლებრივ გადაწყვეტილებებზე პატიმრების დაყოლიება და ჩვენებების მოპოვება…”, – განაცხადა ლევან გოგიჩაიშვილმა.
მისი თქმით, წამება და არაადამიანური მოპყრობა სხვადასხვა მეთოდებით ხდებოდა.
“წამება ხდებოდა სხვადასხვა მეთოდებით – მოხრჩობით, იძულებით პოზაში ყოფნით, დაჭიმვით, ხელბორკილების დაბმით, დაკიდებით, მკვლელობის იმიტაციით, წყალში ჩაძირვით, ცხელი საგნებით დამწვრობის მიყენებით, დამდუღვრით, სხეულზე სიგარეტის დაწვით, ცივ შენობაში შიშველ მდგომარეობაში ჩაყრით… მაგალითად, მე-6 დაწესებულებაში წითელმა ჯვარმა შემთხვევით შეიხედა საკანში და აღმოაჩინა შაკო ოვაკიმიანი და რამდენიმე ადამიანი, რომლებიც ციხის ადმინისტრაციას დავიწყებული ჰყავდა და რამდენიმე დღის განმავლობაში, ცივ ოთახში შიშველ მდგომარეობაში იმყოფებოდნენ”, – განაცხადა გოგიჩაიშვილმა.
როგორც მან აღნიშნა, ადამიანის უფლებათა დაცვის კომიტეტის დასკვნა პირველი ოფიციალური დოკუმენტია, რომელიც წამების ფაქტებზე შეიქმნა.