აშშ-ის პრეზიდენტი დონალდ ტრამპი აცხადებს, რომ ნიგერიაში მოვლენები სახიფათოდ ვითარდება, რადგან ათასობით ქრისტიანს კლავენ.
როგორც აშშ-ის პრეზიდენტი სოციალურ ქსელში გამოქვეყნებულ პოსტში წერს, ნიგერიაში ქრისტიანობა ეგზისტენციალური საფრთხის წინაშე დგას და რადიკალი ისლამისტები არიან პასუხისმგებელი „მასობრივ ხოცვა-ჟლეტაზე“.
„ნიგერიაში ქრისტიანობა ეგზისტენციალური საფრთხის წინაშე დგას. ათასობით ქრისტიანს კლავენ. რადიკალი ისლამისტები არიან პასუხისმგებელნი ამ მასობრივ ხოცვა-ჟლეტაზე. ამით მე ნიგერიას „განსაკუთრებული შეშფოთების ქვეყნად“ ვაცხადებ, მაგრამ ეს ყველაზე მცირედია. როდესაც ქრისტიანებს ან ნებისმიერ მსგავს ჯგუფს ხოცავენ, როგორც ეს ნიგერიაში ხდება (მსოფლიოში 3 100 შემთხვევა 4 476-ის წინააღმდეგ), რაღაც უნდა გაკეთდეს! მე ვთხოვ კონგრესმენ რაილი მურს, თავმჯდომარე ტომ კოულთან და წარმომადგენელთა პალატის ასიგნებების კომიტეტთან ერთად, დაუყოვნებლივ გამოიძიონ ეს საკითხი და მომახსენონ. შეერთებული შტატები ვერ იქნება უმოქმედოდ, ვიდრე ასეთი სისასტიკე ხდება ნიგერიასა და მრავალ სხვა ქვეყანაში. ჩვენ მზად ვართ, გვსურს და შეგვიძლია, გადავარჩინოთ ჩვენი დიდი ქრისტიანი მოსახლეობა მსოფლიოში“, – წერს აშშ-ის პრეზიდენტი.
ამასთან, „სქაინიუსი“ წერს, რომ ნიგერიაში მოქმედი ტერორისტული დაჯგუფება „ბოკო ჰარამი“ ქვეყნის ჩრდილოეთ ნაწილში თავდასხმებს ხშირად აწყობს, სადაც მოსახლეობის უმეტესობას მუსლიმები შეადგენენ. მათივე ცნობით, დაჯგუფების მსხვერპლთა უმეტესობას მუსლიმები შეადგენენ. აშშ-ს ორპარტიული საერთაშორისო რელიგიური თავისუფლების კომისიის ანგარიშის მიხედვით, 2011 წლიდან დღემდე ნიგერიაში ისლამისტურმა დაჯგუფებებმა 37 000-ზე მეტი ადამიანი მოკლეს.