პოლონური კერძო მაუწყებელი RMF FM, ევროკავშირის ოფიციალურ პირებზე დაყრდნობით, იტყობინება, რომ თუ პოლონეთი, სლოვაკეთი და უნგრეთი უკრაინული სურსათის იმპორტზე ცალმხრივ აკრძალვებს შეინარჩუნებენ, ევროკომისია სასამართლო პროცედურებს დაიწყებს.
RMF FM-ის ცნობით, ბრიუსელი მზად არის იმოქმედოს, თუ სამი ქვეყანა ემბარგოს არ მოხსნის. ეს ნაბიჯი, შესაძლოა, ევროპული კავშირის მართლმსაჯულების სასამართლო განხილვის თემად იქცეს და ფინანსური ჯარიმები მოჰყვეს.
ეს გაფრთხილება მოჰყვა პოლონეთის გადაწყვეტილებას, რომელიც ამ ქვეყნის სოფლის მეურნეობის სამინისტრომაც დაადასტურა, რომლის მიხედვითაც, ევროკავშირ-უკრაინის ახალი სავაჭრო შეთანხმების ძალაში შესვლის მიუხედავად, ოფიციალური ვარშავა შეზღუდვების შენარჩუნებას მაინც აპირებს.
ევროკავშირის ოფიციალური პირის განმარტებით, ცალმხრივი ემბარგოს შემოღება ევროკავშირის კანონმდებლობას ეწინააღმდეგება.
RMF FM-ის ინფორმაციით, უკრაინული მარცვლეულის ექსპორტის ზრდის ფონზე, 2023 წელს ევროკომისიამ კონკრეტული ზომები მიიღო, რომელიც პოლონეთის, სლოვაკეთისა და უნგრეთის შეშფოთების საპასუხოდ შეიმუშავა, მაგრამ მათ შეუსრულებლობაზე თვალს ხუჭავდა, ახლახანს უკრაინასთან ახალი სავაჭრო შეთანხმების გაფორმების შემდეგ კი, „მოთმინება დაკარგა“.
ოფიციალური პირის თქმით, ახალი შეთანხმება ითვალისწინებს უკრაინულ იმპორტზე რაოდენობრივი ლიმიტების დაწესებას და ბაზარზე სწრაფი ჩარევისთვის საჭირო სპეციალური დამცავი მექანიზმის შემუშავებას.
ერთ-ერთი ევროპელი დიპლომატი აღწერს იმ „უზარმაზარი იმედგაცრუებას“, რომელიც აკრძალვების გაგრძელებამ ევროკომისიის შიგნით გამოიწვია.
ამასთან, ბრიუსელი სასამართლო პროცედურების დაუყოვნებლივ დაწყებას არ აპირებს და ვარაუდობს, რომ ეს პროცესი თვეების განმავლობაში გაგრძელდება, რომლის დროსაც ორმხრივი მოლაპარაკებების გამართვას შეეცდება.
„ამავდროულად, პოლონეთის ხელისუფლებას ბრიუსელის მხრიდან მხარდაჭერის იმედი აქვს და ამ თემის სასწრაფოდ წამოწევს არ აპირებს“, – განუცხადა RMF FM-ს სამთავრობო წყარომ.
პოლონეთი, სლოვაკეთი და უნგრეთი მკაცრი ემბარგოს გამოყენებას აგრძელებენ. პოლონეთში აკრძალვა ვრცელდება ხორბალზე, სიმინდზე, რაფსზე, მზესუმზირის თესლსა და ზოგიერთ წარმოებულ პროდუქტზე, როგორიცაა, მაგალითად, შროტი.
უკრაინამ 2023 წლის სექტემბერში მსოფლიო სავაჭრო ორგანიზაციას (WTO) კონსულტაციების გამართვის თხოვნით მიმართა, მაგრამ ისინი დღემდე არ ჩატარებულა.
რუმინეთმა დანერგა ლიცენზირების რეჟიმი, რომელიც მარცვლეულის იმპორტისთვის წინასწარ ნებართვას მოითხოვს და არაოფიციალურად შეთანხმებული ნებაყოფლობითი ექსპორტის შეზღუდვებს უკავშირდება. ეს არის მოდელი, რომელსაც გარკვეული დროის განმავლობაში ევროკომისია ემხრობოდა.
ბულგარეთმა კი მზესუმზირის თესლის იმპორტი აკრძალა და პარალელურად, უკრაინასთან ნებაყოფლობითი ექსპორტის ლიმიტების განხილვა დაიწყო.