ციურიხის კანტონის მთავრობა თავის პოზიციაზე რჩება – ღაზაში დაშავებული ბავშვების მიღებას არ აპირებს. ეს გადაწყვეტილება უსაფრთხოებიდან გამომდინარე რისკებს უკავშირდება.
ოქტომბრის დასაწყისში ცნობილი გახდა, რომ მემარჯვენე „შვეიცარიის სახალხო პარტიის“ წარმომადგენელს, ჯანდაცვის დეპარტამენტის დირექტორს, ნატალი რიკლის ბავშვების მიღებაზე უარის თქმა ჰქონდა განზრახული. მართალია, „სოციალ-დემოკრატიულმა პარტიამ“, ღაზელი ბავშვების მიღების მოთხოვნით, 42 ათასი მხარდამჭერის ხელმოწერა წარადგინა, მაგრამ რიკლის პოზიცია არ შეუცვლია.
ოთხშაბათს ციურიხის კანტონის მთავრობამ ოფიციალურად გამოაცხადა, რომ დაშავებული ბავშვების მიღების პროცესში მონაწილეობას არ მიიღებს. მთავარ მიზეზად უსაფრთხოებასთან დაკავშირებული რისკები სახელდება – ციურიხის კანტონის მთავრობა პალესტინურ სამხედრო დაჯგუფება „ჰამასთან“ ან სხვა ორგანიზაციებთან ცალკეული პირების შესაძლო კავშირს არ გამორიცხავს. შესაბამისად, მისი აზრით, ბავშვებისა და მათი თანმხლები პირების მიღება „გაუთვლელ რისკებს“ შეიცავს.
დაახლოებით 100 თანმხლები პირი
გარდა ამისა, დაშავებული ბავშვების სამედიცინო და ფსიქოლოგიური დახმარება მნიშვნელოვან ძალისხმევას მოითხოვს. დაახლოებით 100 თანმხლებ პირს თავიდანვე უნდა მიენიჭოს მუდმივი ჰუმანიტარული თავშესაფარი და, შესაბამისად, ჯანდაცვისა და სოციალურ შეღავათებზე წვდომა, მოგვიანებით კი – ოჯახის გაერთიანების უფლება.
ჯამში 20 ბავშვის მიღება ციურიხის მთავრობისთვის ასევე „სიმბოლური და თვითნებური ჟესტია, რომელსაც შეზღუდული ეფექტი ექნება“. იმის ნაცვლად, რომ ბავშვები ციურიხში ჩაიყვანონ, კანტონის მთავრობას ურჩევნია, ფინანსური სახსრები ადგილზე გამოიყენოს. ფედერალური მთავრობის აზრით, ამ ფულით ადგილზე გაცილებით მეტი ადამიანის დახმარება შეიძლება.
სიმბოლური პოლიტიკა
მემარჯვენე-ცენტრისტულმა „რადიკალურ-ლიბერალურმა პარტიამ“ და „შვეიცარიის სახალხო პარტიამ“ ციურიხის მთავრობის გადაწყვეტილება მოიწონეს. ამ პარტიებმა განაცხადეს, რომ მათ მტკიცე პოზიცია დაიკავეს „პოტენციურად საშიში პოლიტიკის“ წინააღმდეგ, რომელიც საკუთარი ინიციატივით წამოიწყეს მინისტრებმა: ბეატ იანსმა, ელისაბეტ ბაუმ-შნაიდერმა (ორივე „სოციალ-დემოკრატიული პარტიიდან“) და მარტინ პფისტერმა („ცენტრისტული პარტია)“.
გასული პარასკევიდან მოყოლებული, ღაზის სექტორიდან ჩამოყვანილი შვიდი ბავშვი შვეიცარიის საავადმყოფოებში მკურნალობს. არასრულწლოვნები, რომელთა უმეტესობა ათ წლამდე ასაკისაა, ჟენევის, ვოს, ტიჩინოს, ბაზელ-შტადტის, ლუცერნისა და სანქტ-გალენის კანტონების პედიატრიულ საავადმყოფოებში იმყოფებიან. ნოემბერში დაგეგმილია კიდევ 13 ბავშვისა და მათი ნათესავების მიღება.