საპროცედურო საკითხთა საპარლამენტო კომიტეტის თავმჯდომარემ 2007 წლის 7 ნოემბერს „იმედში“ შეჭრაზე კომენტარი გააკეთა. მისი თქმით, მიხეილ სააკაშვილი და მისი თანამოაზრეები დემოკრატიის სახელით ძალადობრივი ქმედებებით ხელმძღვანელობდნენ ქვეყანას. მან ყურადღება გაამახვილა მაშინდელ მედია დამოუკიდებლობის ხარისხსა და 2012 წლის შემდეგ მედიაპლურალიზმის განვითარების დონეზე.
„2007 წლის 7 ნოემბერს მიხეილ სააკაშვილის რეჟიმმა „იმედის“ წინააღმდეგ სამარცხვინო ფაქტი ჩაიდინა, როდესაც მოხდა ძალმომრეობით ტელეკომპანიაში შეჭრა, ჟურნალისტებზე თავდასხმა, ტექნიკის დამტვრევა, შემდგომ მიტაცება ტელევიზიის და ამ ყველაფერს ისინი დემოკრატიის და ქვეყნის დამოუკიდებლობის ჭრილში ასაღებდნენ. [ეს არის] კიდევ ერთი დასტური იმისა, თუ როგორ ხდებოდა 2012 წლამდე მასმედიაზე ზეწოლა, ხელისუფლების ძალმომრეობა და დღეს როგორ კარდინალურად არის შეცვლილი სიტუაცია“, – განაცხადა მათიკაშვილმა.
2007 წლის 7 ნოემბრის მოვლენებიდან 18 წელი გავიდა. რამდენიმე ლოკაციაზე მშვიდობიანი აქციის დარბევის შემდეგ მიხეილ სააკაშვილის რეჟიმი ტელეკომპანია „იმედში” შეიჭრა.