მთავარი თემა იკვეთება საგანგებოდ მნიშვნელოვანი, ვფიქრობ – სკანდალური, რომ უცხოელმა მეგობრებმა უკარნახეს ეს გადაწყვეტილება, რომ სასამართლოში უნდა უჩივლონ „ქართულ ოცნებას“, – ასე ეხმაურება საქართველოს პარლამენტის თავმჯდომარის პირველი მოადგილე, „ნაციონალური მოძრაობის“ გადაწყვეტილებას, რომ „ქართულ ოცნებას“ სასამართლოში უჩივლოს.
მისი თქმით, თავად ის ფაქტი, რომ ეს გადაწყვეტილება პარტიამ საერთაშორისო პარტნიორების მოთხოვნით მიიღო, ადასტურებს, რომ „ნაცმოძრაობა“ იმართება გარედან.
„მთავარი თემა იკვეთება საგანგებოდ მნიშვნელოვანი, მე ვფიქრობ – სკანდალური, რომ უცხოელმა მეგობრებმა უკარნახეს ეს გადაწყვეტილება, რომ სასამართლოში უნდა უჩივლონ „ქართულ ოცნებას“. თვითონ სასამართლოში დავა პირიქით, კარგია იმ შემთხვევაში, როცა სიმართლის დადგენა გინდა. მაგრამ როცა ამას აქვს ის ფუნდამენტი და საფუძველი, რაზედაც ბეჟაშვილი საუბრობს, ეს იმას ნიშნავს, რომ ეს ადამიანები არიან ჩამოყალიბებული, როგორც საკუთარი ქვეყნის წინააღმდეგ მებრძოლთა ჯგუფის წარმომადგენლები. თორემ სასამართლოში საქმის განხილვა ჩვენთვის უცხო არ არის. ეს საერთოდ დემოკრატიული სამყაროს ფუნდამენტია“, – განაცხადა გიორგი ვოლსკიმ.
„ნაციონალური მოძრაობა“ აღიარებს, რომ პარტია გარედან მიღებული დავალებებით მოქმედებს. ეს დღეს კიდევ ერთხელ დადასტურდა. „ნაციონალური მოძრაობა“ საერთაშორისო პარტნიორების მოთხოვნით, საკონსტიტუციო დავას იწყებს. განცხადება ამასთან დაკავშირებით ლევან ბეჟაშვილმა გააკეთა. მან თქვა, რომ პარტია სასამართლოს საერთაშორისო პარტნიორების თხოვნით მიმართავს. „ნაცმოძრაობა“ სასამართლოს სამი სარჩელით მიმართავს. მათ შორის პარტია გაასაჩივრებს საგამოძიებო კომისიის დასკვნას. ასევე, მომზადდება სარჩელი იმ კანონების წინააღმდეგ, რომლითაც, ბეჟაშვილის თქმით, „ქართული ოცნება“ პარტიებს აუქმებს. მესამე ეტაპი კი, როგორც ბეჟაშვილმა განმარტა, თავად „ქართული ოცნების“ სარჩელის წინააღმდეგ საჩივარი იქნება.