ბელარუსმა არ დააკმაყოფილა ოფიციალური ვილნიუსის განმეორებითი თხოვნა, რომ ლიეტუვურ სატვირთო მანქანებს მიეცეთ უფლება, საკუთარ ქვეყანაში დროებით დახურული მედინინკაისა და შალჩინინკაის სასაზღვრო-გამშვები პუნქტების გავლით დაბრუნდნენ. მინსკი აცხადებს, რომ ლიეტუვური მანქანები ბელარუსში მანამდე დარჩებიან, სანამ ვილნიუსი ამ გამშვებ პუნქტებს ხელახლა არ გახსნის.
ბელარუსული საინფორმაციო პორტალის „Nasha Niva“-ს ცნობით, ლიეტუვური სანომრე ნიშნების მქონე სატვირთო მანქანებს ბელარუსის დატოვების უფლებას არ აძლევენ, თუმცა მათ მძღოლებს ქვეყნიდან გასვლის ნებართვა აქვთ.
„სანამ ლიეტუვური მხარე მედინინკაისა და შალჩინინკაის სასაზღვრო გამშვებ პუნქტებზე ნორმალურ მოძრაობას არ აღადგენს, ლიეტუვური სარეგისტრაციო ნომრების მქონე სატვირთო მანქანებს ბელარუსის საზღვარზე არ გაატარებენ“, – განუცხადა გამოცემას ბელარუსის სახელმწიფო საბაჟო კომიტეტმა.
სახელმწიფო საინფორმაციო სააგენტო „Belta“-ს ინფორმაციით, დაახლოებით 800 ლიეტუვური სატვირთო მანქანა საზღვრის მახლობლად არსებულ პარკირების ზონებშია გადაყვანილი: 70 -კამენი-ლოგის რაიონში, 160 – ბენიაკონის რაიონში, 220 – კოტლოვკას რაიონში და 350 – ბერესტავიცას რაიონში. ბელარუსული მხარის შეფასებით, ქვეყანაში დაახლოებით 1 100 ლიეტუვური სატვირთო მანქანა იმყოფება.
ლიეტუვის სახელმწიფო საზღვრის დაცვის სამსახურის (VSAT) პრეს-მდივანმა, გიედრიუს მიშუტისმა სამშაბათს დილით სააგენტო BNS-ს განუცხადა, რომ ორშაბათს საღამოს, სამსახურის უფროსმა, რუსტამას ლიუბაევასმა თავის ბელარუს კოლეგას ოფიციალური თხოვნა გაუგზავნა.
ეს უკვე მეორე შემთხვევაა, როდესაც ლიეტუვა ბელარუსის ხელისუფლებას მისი სატვირთო მანქანების დაბრუნების თხოვნით მიმართავს. გასულ კვირას ვილნიუსმა მინსკს შესთავაზა, შალჩინინკაის გამშვები პუნქტის ხელახლა მხოლოდ ლიეტუვაში ან ევროკავშირში რეგისტრირებული სატვირთო მანქანებისთვის გაეხსნა, მაგრამ ბელარუსმა ეს მოთხოვნა უარყო.
მიშუტისმა დაადასტურა, რომ ორშაბათ დილით, 09:00 საათამდე, ორ ლიეტუვურ სატვირთო მანქანას მედინინკაის გავლით საზღვრის გადაკვეთის უფლება მისცეს, მაგრამ ლიეტუვაში სხვა მანქანების შემოსვლა აღარ მომხდარა.
„ისინი ტექნიკური მიზეზების გამო გამოატარეს, მაგრამ 9 საათის შემდეგ ბელარუსმა მანქანების შემოშვება შეწყვიტა“, – აღნიშნა მან.
ორშაბათს ბელარუსის ლიდერმა, ალექსანდრე ლუკაშენკომ განაცხადა, რომ ქვეყანაში გაჩერებული ლიეტუვური სატვირთო მანქანები კომერციულ ავტოსადგომებზე გადაჰყავთ და თითოეულს 120 ევროს ოდენობის ყოველდღიური გადასახადი დაუწესდება. მისივე თქმით, თუ მათი მფლობელები ამ გადასახადს არ გადაიხდიან, მანქანების კონფისკაცია მოხდება.
ლიეტუვის მთავრობას ბელარუსთან სასაზღვრო გადასასვლელები დროებით, ერთი თვით, 30 ნოემბრამდე აქვს დახურული.