იმის გადასაფარად, რომ თითქოს ოპოზიციას ბრიუსელიდან ტექსტი არ მიუღია, ისინი ამ ტექსტის შედგენას ერთმანეთს აბრალებენ. ოპოზიციის ლიდერები „ქრონიკის“ კითხვებს ურთიერთგამომრიცხავი არგუმენტებით პასუხობენ.
„რაში გვჭირდება ვიღაცის დაწერა, ჩვენ შესაბამის ტექსტს ვერ დავწერდით?! თუ მართლა ვიღაც უწიგნური გგონივართ?! ეგ წერილი დავწერეთ ჩვენ, ვინც ვიყავით იქ და პოლიტიკურმა პარტიებმა“, – განაცხადა მოძრაობა „თავისუფლების მოედნის“ დამფუძნებელმა ლევან ცუცქირიძემ.
„წერილი დაიწერა ერთობლივად. ყველამ, ვინც აქ იდგა, ერთობლივად მიიღო მონაწილეობა ამ წერილის დაწერაში. საიდან გაჩნდა საერთოდ ეს ინგლისური ვერსია, თან შეცდომებით არის დაწერილი. ბრიუსელი ეგეთ ტექსტს ვერ გამოაგზავნიდა. სცენაზე ვინც იდგა და ბრიფინგი გააკეთა ყველა ჩართული იყო ამ პროცესში“, – განაცხადა კოალიცია „ახალი“-ს წევრმა გიორგი ბუტიკაშვილმა.
„განცხადების ტექსტი არის შედგენილი იმ ადამიანების მიერ, რომლებიც რუსთაველზე იდგნენ. ტექსტის შემუშავებაში მონაწილეობა არ მიგვიღია. Facebook-ზე ვნახე, რომ გიგა ლემონჯავამ დაწერაო“, – განაცხადა კოალიცია „ერთიანობა-ნაციონალური მოძრაობის“ წევრმა ირაკლი ფავლენიშვილმა.