აშშ-ის არმიის სამხრეთ სარდლობის ინფორმაციით, მათ კარიბის ზღვაში გემი გაანადგურეს, რომელსაც ნარკოტიკები გადაჰქონდა.
როგორც სამხრეთ სარდლობის მიერ სოციალურ ქსელ X-ში გავრცელებულ ინფორმაციაშია აღნიშნული, შემთხვევა 10 ნოემბერს მოხდა.
„დაზვერვამ დაადასტურა, რომ გემი ნარკოტიკების უკანონო კონტრაბანდით იყო დაკავებული, ნარკოტრეფიკის ცნობილი მარშრუტით გადაადგილდებოდა და ნარკოტიკები გადაჰქონდა“, – აღნიშნულია ინფორმაციაში.
სამხრეთ სარდლობაში აღნიშნავენ, რომ გემზე მყოფი ეკიპაჟის ოთხივე წევრი დაღუპულია. ამერიკული მხარის მტკიცებით, გემზე თავდასხმა საერთაშორისო წყლებში მოხდა.
ცნობისთვის, გუშინ აშშ-ის თავდაცვის მდივანმა პიტ ჰეგსეტმა განაცხადა, რომ ამერიკა სამხედრო ოპერაციას სახელწოდებით „სამხრეთის შუბი“ იწყებს. ოპერაციის მთავარ მიზანს ზღვით ნარკოტიკების კონტრაბანდასთან ბრძოლა წარმოადგენს.