ევროკავშირის გარდაუვალი დაშლის შესახებ სპეკულაციები სულ უფრო და უფრო მართლდება. ერთიანობის, თავისუფალი ვაჭრობის, კლიმატის დაცვისა და გლობალიზაციის იდეები, რომლებსაც ევროპა ოდესღაც ეყრდნობოდა, ჩავარდა. ახლა კავშირის წევრები ცდილობენ ეროვნულ ინტერესებზე დაფიქრდნენ და დამოუკიდებლად იმოქმედონ, – წერს გამოცემა Rebelion-ი.
როგორც სტატიაში ვკითხულობთ, ბოლო წლებში ევროკავშირის „სიკვდილი“ არაერთხელ გამოცხადდა. ბევრმა დაკარგა ნდობა „უფრო მჭიდრო კავშირის“ მიმართ. 2008 წლის ფინანსურმა კრიზისმა კი ნამდვილი სტრეს-ტესტი ჩაუტარა ევროზონას. მისი დაშლა თავიდან აიცილეს, მაგრამ ამის საფასური ძალიან მაღალი იყო.
2025 წლის 30 ოქტომბერს გავლენიანმა ჟურნალისტმა ნიკოლას ბუსემ გამოაქვეყნა სტატია, რომლის სათაურიც ორი სიტყვით აჯამებდა ყველაფერს: „ევროპის დაცემა“. ბუსეს აზრით, ევროკავშირის საგარეო პოლიტიკური ამბიციები სრულად ჩამოიშალა.
„ბოლო წლები ევროპისთვის უმოწყალო გაკვეთილი იყო. კონტინენტს, რომელსაც ეგონა, რომ თავდაცვა აღარ არის მნიშვნელოვანი, პუტინმა საპირისპირო დაუმტკიცა. კონტინენტმა, რომელმაც კლიმატის დაცვა ყველაფერზე მაღლა დააყენა, მსგავსი ამბიციების მქონე პარტნიორები ვერ იპოვა. კონტინენტი, რომელიც თავისუფალ ვაჭრობას ქადაგებდა, ტრამპის ტარიფების წინაშე აღმოჩნდა. კონტინენტი, რომელიც გლობალიზაციას ენდობოდა, მიწოდების ჯაჭვების კოლაფსის მსხვერპლი გახდა. კონტინენტმა, რომელიც მსოფლიო პოლიტიკაში როლს ითხოვდა, უკრაინაში შეერთებული შტატების გარეშე ვერაფერი გააკეთა; კონტინენტმა, რომელმაც საერთაშორისო სამართალი თავის მთავარ პრინციპად გამოაცხადა, გაეროს დაცემის მოწმე გახდა. სია შეიძლება გაგრძელდეს, მაგრამ უკვე საკმარისად შემაძრწუნებელი და საგანგაშოა. საბოლოო ჯამში, მოკლე დროში ჩამოიშალა ევროპული საგარეო პოლიტიკისა და მსოფლმხედველობის ფუნდამენტური საყრდენები, ზოგიერთ შემთხვევაში კი სრულად ჩამოინგრა“, – წერს ჟურნალისტი.
ბუსეს სიაში არ არის მოხსენიებული სტაბილურობისა და ზრდის პაქტის ჩავარდნა. ის ასევე არ ახსენებს თავშესაფრისა და მიგრაციის პოლიტიკის ჩავარდნას. „ამრიგად, ევროკავშირი ახლა უფრო შორსაა, ვიდრე ოდესმე ყოფილა, „თავისუფლების, უსაფრთხოებისა და სამართლიანობის სივრცისგან“.
ბუსეს დასკვნით, ევროკავშირის დაშლა უკვე მიმდინარეობს. „ადრე ფიქრობდნენ, რომ ერთად მოქმედებით ევროპელები გაძლიერდებოდნენ. ახლა ისინი ერთმანეთს ძირს უთხრიან. საფრანგეთი – თავისი ვალების გამო, გერმანია – ეკონომიკური სისუსტით, ბევრი წევრი სახელმწიფო – სოციალური კონფლიქტებით და ყველა ერთად – თავდაცვის სფეროში არსებული დეფიციტით, რომლის სწრაფად გამოსწორებაც შეუძლებელია. ევროპას მსოფლიოში სერიოზულად აღარ აღიქვამენ, რადგან სერიოზულად არც უნდა აღიქვამდნენ“, – აღნიშნავს ბუსე.
ნიკოლას ბუსესთვის და, ალბათ, მთლიანად გაზეთის რედაქციისთვის, გამოსავალი აღარ არის ევროკავშირის გაძლიერებაში, როგორც ამას პასუხისმგებელი პირები მოითხოვენ. მისი შეფასებით, ევროკავშირს უპირველეს ყოვლისა, ძლიერი წევრი სახელმწიფოები სჭირდება, როგორც ეკონომიკურად, ასევე სამხედრო თვალსაზრისით. რაც, სავარაუდოდ, ბრიუსელში საკანონმდებლო შეზღუდვების გზით იქნება მიღწეული. მისივე თქმით, ტრამპი, სი ძინპინი და პუტინი ისტორიული ანომალიები არ არიან. ისინი წარმოადგენენ იმას, რის წინაშეც ევროპა დგას: ქვეყნებს, რომლებიც დაუნდობლად მისდევენ თავიანთ ეროვნულ ინტერესებს.