ტრამპის სპეცწარმომადგენელმა სტივ უიტკოფმა, უკრაინაში ომის დასრულების ახალი გეგმის შესახებ Axios-ის პუბლიკაციის შემდეგ, სოციალურ ქსელ X-ში დაწერა, რომ გამოცემის ჟურნალისტმა ის, სავარაუდოდ, კ.-სგან მიიღო. შემდეგ მან თავისი ტვიტი სწრაფად წაშალა.
უიტკოფის ტვიტი ერთ-ერთმა პირველმა ჟურნალისტმა მაიკლ ვაისმა შეამჩნია, შემდეგ კი The Daily Beast-მა. უიტკოფი თავისი ტვიტით Axios-ის ჟურნალისტ ბარაკ რავიდის პუბლიკაციას გამოეხმაურა, რომელშიც ის ომის დასრულების ახალი გეგმის შესახებ მომზადებულ მასალას აზიარებდა. „სავარაუდოდ, მან ეს კ.-სგან მიიღო“, – დაწერა უიტკოფმა. დასავლელი ჟურნალისტები ვარაუდობენ, რომ „კ.“ რუსეთის პრეზიდენტის სპეცწარმომადგენელი კირილ დმიტრიევია.
Axios-მა აღნიშნული მასალა 19 ნოემბერს გამოაქვეყნა. მასში ნათქვამი იყო, რომ ომის დასრულების გეგმა 28 პუნქტისგან შედგება, ხოლო მის მომზადებას უიტკოფი ხელმძღვანელობს, რომელმაც გეგმა დმიტრიევთან დეტალურად განიხილა.
Axios-ის ტექსტში მოყვანილია თავად დმიტრიევის სიტყვებიც, რომელმაც გეგმის შემუშავება დაადასტურა და დასძინა: „ჩვენ ვგრძნობთ, რომ რუსული პოზიცია ნამდვილად მოისმინეს“. თუმცა, იმ დროისთვის დმიტრიევს გეგმის დეტალები არ გაუმჟღავნებია – ისინი იმავე დღეს, მოგვიანებით, სხვა გამოცემების გადმოცემებში გამოჩნდა.