ის, რაც დღეს ხდება რუსეთ-უკრაინის და რუსეთ-დასავლეთის დაპირისპირების ფონზე, ამ შემთხვევაში საქართველოსთვის იყო სხვა როლი განკუთვნილი, – განუცხადა ჟურნალისტებს რეგიონული პოლიტიკისა და თვითმმართველობის საპარლამენტო კომიტეტის თავმჯდომარე ირაკლი ქადაგიშვილმა ევროპის ქვეყნების საგარეო საქმეთა მინისტრების მხრიდან საქართველოს ხელისუფლების მისამართით გამოთქმულ კრიტიკასთან დაკავშირებით.
ქადაგიშვილის თქმით, საქართველოს ხალხმა ამ როლს უარი უთხრა და აირჩია ის ხელისუფლება, რომელმაც საქართველოს მშვიდობა, სტაბილურობა და განვითარება მოუტანა.
„ეს არ შედის ძალიან დიდ გეოპოლიტიკურ საჭადრაკო დაფაზე მოთამაშეების ინტერესში. აქედან გამომდინარე, ასეთი განცხადებები მუდმივად იქნება სანამ ეს გეოპოლიტიკური დაძაბულობა მსოფლიოში ასეთი მძაფრია. ის, რომ საფრანგეთს და ევროპის ძალიან ბევრ ქვეყანას უამრავი პრობლემა აქვს, ფაქტობრივად პოლიტიკური კრიზისები, რა თქმა უნდა, გამოწვეულია სწორედ ამ პოლიტიკით“, – აღნიშნა ირაკლი ქადაგიშვილმა.