საფრანგეთის მთავრობის პრესსპიკერმა მო ბრეჟონმა გამოთქვა სურვილი, რომ დასრულდეს შეიარაღებული ძალების გენერალური შტაბის მეთაურის განცხადებებით გამოწვეული პოლემიკა და დაადასტურა, რომ „ჩვენი შვილები უკრაინაში არ დაიღუპებიან”.
„ჩვენი შვილები უკრაინაში საბრძოლველად და დასაღუპად არ წავლენ“, – აღნიშნა მო ბრეჟონმა.
ეს განცხადება მოჰყვა პოლემიკას, რომელიც საფრანგეთის შეიარაღებული ძალების გენერალური შტაბის მეთაურის ფაბიენ მანდონის სიტყვებმა გამოიწვია, რომლის აზრითაც „საფრანგეთი უნდა შეეგუოს თავისი შვილების დაკარგვას”.
„ძალიან ნათლად ვიტყვით: ჩვენი შვილები, იმ გაგებით, როგორც ჩვენ ვგულისხმობთ, არ წავლენ უკრაინაში საბრძოლველად და დასაღუპად. შეიარაღებული ძალების გენერალური შტაბის მეთაური საუბრობდა ყველა იმ ჯარისკაცზე, რომლებიც განლაგებულნი არიან მთელ მსოფლიოში და არიან 18-დან 27 წლამდე. არ შეიძლება უგულებელვყოთ ის ფაქტი, რომ ამ ჯარისკაცების გარკვეული რაოდენობა დაიღუპა ქვეყნის ფარგლებს გარეთ ოპერაციების დროს”, – აღნიშნა საფრანგეთის მთავრობის სპიკერმა.