აშშ-ის ვიცე-პრეზიდენტი ჯეი დი ვენსი პრეზიდენტ დონალდ ტრამპის უკრაინის შესახებ 28-პუნქტიან სამშვიდობო გეგმას სოციალურ ქსელ X-ში გამოეხმაურა და აღნიშნა, ფანტაზიაა იმაზე ფიქრი, რომ თუ ამერიკა და მოკავშირეები უკრაინას მეტ ფულს, შეიარაღებას მისცემენ, ან რუსეთს მეტ სანქციას დაუწესებენ, გამარჯვება ახლოს იქნება.
„ფანტაზიაა იმაზე ფიქრი, რომ თუ ჩვენ მეტ ფულს, შეიარაღებას მივცემთ, ან მეტ სანქციას დავაწესებთ, გამარჯვება ახლოს იქნება. მშვიდობას ვერ შექმნიან წარუმატებელი დიპლომატები ან პოლიტიკოსები, რომლებიც ფანტაზიის სამყაროში ცხოვრობენ. მას შექმნიან მხოლოდ ჭკვიანი ადამიანები, რომლებიც რეალობას აღიქვამენ“, – დაწერა ვენსმა.
მისი თქმით, ნებისმიერი კრიტიკა სამშვიდობო დარეგულირების საკითხის მიმართ, რომელზედაც აშშ-ის პრეზიდენტის ადმინისტრაცია მუშაობს, ან წარმოადგენს ამ ჩარჩოს არასწორად გაგებას, ან არასწორად აღწერს არსებულ რეალობას ადგილზე.
„ნებისმიერმა სამშვიდობო გეგმამ უნდა შეაჩეროს მკვლელობები და უზრუნველყოს უკრაინის სუვერენიტეტი, იყოს მისაღები როგორც რუსეთისთვის, ისე უკრაინისთვის, მაქსიმალურად შეამციროს ომის ხელახლა დაწყების რისკი“, – დასძინა მან.