აშშ-ის სახელმწიფო დეპარტამენტმა საკუთარ საელჩოებს დაავალა, შეიმუშაონ დასკვნები, თუ რა გავლენას ახდენს მასშტაბური მიგრაცია ადამიანის უფლებებსა და საზოგადოებრივ უსაფრთხოებაზე.
როგორც სახელმწიფო დეპარტამენტის მიერ სოციალურ ქსელ X-ში გავრცელებულ განცხადებაშია აღნიშნული, მასობრივი მიგრაცია დასავლურ ცივილიზაციას ეგზისტენციალურ საფრთხეს უქმნის.
„მასობრივი მიგრაცია დასავლური ცივილიზაციისთვის ეგზისტენციალურ საფრთხე წარმოადგენს და ამერიკის საკვანძო მოკავშირეების სტაბილურობას ძირს უთხრის. დღეს სახელმწიფო დეპარტამენტმა აშშ-ის საელჩოებს დაავალა, მოამზადონ დასკვნები, თუ რა გავლენას ახდენს მასობრივი მიგრაცია ადამიანის უფლებებსა და საზოგადოებრივ უსაფრთხოებაზე“, – აღნიშნულია განცხადებაში.
ამასთან ერთად, ამერიკული მხარე აცხადებს, რომ მასობრივი მიგრაცია შეშფოთებას იწვევს ადამიანის უფლებების სფეროში, დასავლეთის ქვეყნები კრიმინალის, ტერორისტული თავდასხმების, სექსუალური დანაშაულისა და მოსახლეობის იძულებითი გადასახლების პრობლემების წინაშე აღმოჩნდნენ.
„აშშ-ის ოფიციალური პირები მოუწოდებენ მთავრობებს, გაატარონ გადამწყვეტი ღონისძიებები და დაიცვან საკუთარი მოქალაქეები საფრთხეებისგან, რომელიც მასობრივი მიგრაციით არის გამოწვეული“, – ნათქვამია სახდეპის განცხადებაში.
ამერიკის ოფიციალური პირები ევროპულ ქვეყნებში მასობრივი მიგრაციის წინააღმდეგ გამოსული ადამიანების დასჯის შემთხვევებსა და მიგრანტების მიერ ჩადენილ დანაშაულებს აღრიცხავენ.
სახელმწიფო დეპარტამენტს თავის განცხადებაში გაერთიანებულ სამეფოში, გერმანიასა და შვედეთში მიგრანტების მონაწილეობით ჩადენილი დანაშაულების რამდენიმე მაგალითიც მოჰყავს.