ჯანდაცვის მინისტრი მიხეილ სარჯველაძე სამედიცინო ტურიზმის საერთაშორისო ასოციაციის ხელმძღვანელებს შეხვდა. ინფორმაციას ამის შესახებ ჯანდაცვის სამინისტრო ავრცელებს.
მათივე ცნობით, მიხეილ სარჯველაძემ Medical Trust International-ის დამფუძნებელსა და აღმასრულებელ დირექტორს ჯანდაცვის მიმართულებით საქართველოში მიმდინარე სხვადასხვა პროგრამა და რეფორმები გააცნო.
„მინისტრმა საერთაშორისო თანამშრომლობის მნიშვნელობაზე გაამახვილა ყურადღება და აღნიშნა, რომ საქართველოსთვის, საინტერესოა ასოციაციის ქოლგის ქვეშ გაერთიანებულ წამყვან გერმანულ და შვეიცარიულ კლინიკებთან პარტნიორობა.
შეხვედრაზე თანამშრომლობის კონკრეტული მიმართულებები განიხილეს, მათ შორის ევროპულ კლინიკებთან ერთობლივი პროგრამების განვითარება, სამედიცინო პერსონალის კვალიფიკაციის ამაღლება და გამოცდილების გაზიარება, სტაჟირებებისა და გაცვლითი პროგრამების განხორციელება. საუბარი შეეხო ახალი საგანმანათლებლო ინიციატივების შექმნასა და საერთაშორისო სტანდარტების შესაბამისი სერვისების გაძლიერების შესაძლებლობებს.
შეხვედრას ესწრებოდნენ ასოციაციის დამფუძნებელი მარიამ ასეფი, აღმასრულებელი დირექტორი საიდ ალდუსარი, „საქართველოს სოლიდარობის ფონდის“ ხელმძღვანელი ხათუნა ჩაჩავა, ფონდის წარმომადგენელი ქეთევან კარტოზია, ასევე, ჯანმრთელობისა და ტურიზმის საერთაშორისო ცენტრის გენერალური დირექტორი ეკატერინე ნეფარიძე“, – ნათქვამია ჯანდაცვის სამინისტროს გავრცელებულ ინფორმაციაში.