უკრაინის ჯარები პოკროვსკის ნაწილს ნოემბრის შუა რიცხვებიდან აკონტროლებენ, თუმცა მათ ზოგიერთი პოზიციებიდან გასვლის ბრძანება მისცეს, – ამის შესახებ უკრაინის შეიარაღებული ძალების მთავარსარდალი ალექსანდრ სირსკი აცხადებს.
ჟურნალისტებთან საუბრისას სირსკიმ განაცხადა, რომ პოკროვსკის გარშემო ვითარება კვლავ რთული რჩება, თუმცა მისი დაცვა გრძელდება.
„პოკროვსკის დაცვა გრძელდება, ჩვენი ჯარები ქალაქის ჩრდილოეთით თითქმის 13 კვადრატულ კილომეტრს აკონტროლებენ. მირნოგრადი ალყაში არ არის მოქცეული. კუპიანსკში ჩვენი წარმატებული კონტრდივერსიული ოპერაცია გრძელდება. კიდევ ერთხელ მინდა, ხაზგასმით აღვნიშნო: რუსული ტყუილების მოცულობა გაცილებით აღემატება რუსული ჯარების წინსვლის რეალურ ტემპს. მტერი უკრაინის წინააღმდეგ ჰიბრიდულ ომში დეზინფორმაციას და ყალბ რუკებს იყენებს, რაც გავლენას ახდენს როგორც უცხოელ აუდიტორიაზე, ასევე ჩვენს საზოგადოებასა და არმიაზე“, – განაცხადა სირსკიმ.