ხაბეიშვილმა „კაპუჩინო“ და ვითომ „სვეცკი“ სიტყვები იცის. ადამიანების ჯგუფია, ვინც ფიქრობს, რომ რევოლუციის მოსაწყობად ღია გამოსვლა ის გამოსავალია, რომელიც „ნაცმოძრაობას“ ხელისუფლების სათავეში მოიყვანს, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
მისივე თქმით, გაუგებარია, ხაბეიშვილი „ნაცმოძრაობის“ ცალკეულ სუბიექტებს რატომ საყვედურობს, რადგან, ვოლსკის განცხადებით, „ჯახისთვის ხაბეიშვილი თუ უფრო ძლიერია, ეს არ ნიშნავს, რომ სხვები არ იყვნენ ჩარეული“.
„ხაბეიშვილი ხალხს ფიზიკური შეტევისკენ მოუწოდებდა. ერთხელ და ორჯერ თუ არ განხორციელდა, მესამედ განხორციელდა – ხაბეიშვილი ზოდელავამ ჩაანაცვლა და შეტევაზე გადავიდა, შეტევიდან კი მძიმე შედეგები მიიღეს. ხაბეიშვილი იმ ხალხს ტყუილად საყვედურობს, ვინც ამაში თითქოს მონაწილეობას არ იღებდა. „ლელოს“ ლიდერმა თქვა, რომ მისი ხალხი არათუ მონაწილეობას იღებდა, არამედ აქტიურად აფინანსებდა ამ პროცესებს. გაუგებარია, ხაბეიშვილი „ნაცმოძრაობის“ ცალკეულ სუბიექტებს რატომ საყვედურობს. მასავით რომ არ ვარჯიშობენ და მისი რიტორიკით არ საუბრობენ, ეს ედავოს ბოკუჩავას. სხვებსაც ნუ ედავება, რადგან ერთნი არიან. ჯახისთვის ხაბეიშვილი თუ უფრო ძლიერია, ეს არ ნიშნავს, რომ სხვები არ იყვნენ ჩარეული, მათ შორის, ბედოვლათი პაატა ბურჭულაძე. რა გააკეთა ისეთი, რაც ხაბეიშვილმა არ გააკეთა? მეტი რა უნდა ქნას? ისეთ ჯანზე არ არის, როგორც ხაბეიშვილი“, – განაცხადა ვოლსკიმ.
ცნობისთვის, „ნაციონალური მოძრაობის“ წევრმა, ლევან ხაბეიშვილმა სასამართლო პროცესზე განაცხადა: „რა გაჩერებთ სახლებში, ღამით კაპუჩინო უნდა დალიოთ და აქციაზე ვერ დარჩებით? და მე თურმე ბრალი უნდა ვაღიარო, აზრზე მოდით, ვერ გავიმარჯვებთ, ვიდრე საკუთარ თავში შიშს არ დაამარცხებთ“.